Grup djru mơnuih mơ̆ng Việt Nam brơi 30 tơn gơnam yua kơ Myanmar hlâo či glăi pơ dêh čar
Thứ tư, 10:24, 09/04/2025
VOV/Siu H' Prăk pơblang
VOV/Siu H' Prăk pơblang
VOV4.Jarai - Tlam lơ 8/4, hlâo či glăi pơ dêh čar, Grup djru mơnuih bưp tơlơi truh gah Ding jum Kông an Việt Nam hơmâo brơi 30 tơn gơnam yua gah ia jrao, gơnam ƀong huă, abăn ao djru ba dêh čar Myanmar pơsir tơlơi truh lŏn pơpư̆ čư̆ mơgơi.
Amăng 10 hrơi nao djru dêh čar Myanmar, Grup mơ̆ng Việt Nam hơmâo djru ba 7 čô mơnuih dŏ kơđông amăng lăm gơnam rơbuh trun. Laih dong, ngă hrŏm hăng tơhan djru mơnuih bưp tơlơi truh mơ̆ng dêh čar pơkŏn djru ba 7 čô mơnuih dong.
Grup hơmâo khăm pơjrao, brơi ia jrao kơ rơbêh 50 čô mơnuih rơka; pơdong 2 boh rơnưh klum ƀaih ngă anih dŏ jăng jai kơ mơnuih rơngiă sang dŏ; pruih ia jrao pơdjai kman kơ lu kual plơi pla. Rơngiao kơ anun dong, grup ăt hyu iâu pơthưr, juh alum pran jua, djru prăk kơ 6 boh sang anŏ hơmâo mơnuih djai./.
Viết bình luận