Tơring čar Gia Lai glăk pơtrut kơtang dưm dăp anom mă bruă čar gưl să tui jơlan gah rơbô̆t, hrŏ trun mơ̆ng 218 trun dô̆ 77 bôh anom mă bruă, pơjing phun akha kơ gong gai dua gưl bruă mă tŭ yua, ba glăi bôh tơhnal. Tui akô̆ bruă dưi pel ĕp, hơdră gong gai gưl să phrâo mơ̆ng Gia Lai tui phiăn pơkă hơnong ñu 32 čô mơnuih rim să (ƀu hmâo tom khul Ping gah, khul grŭp). Mơnuih git gai gưl să phrâo mă yua tơhnal pơkă dưm kơnar hăng gưl tơring glông ră anai.

Abih bang mơnuih mă bruă tui phiăn pơkă gưl tơring glông ră anai amra ba nao pơ̆ gưl să phrâo pioh ngă phun glông jơlan mă bruă, pioh kơtưn bôh thâo mă bruă. Hrŏm hrŏm hăng ngă rơbô̆t jơlan mă bruă, tơring čar ăt pơtrut tañ pel ĕp glăi mơn hăng prăp lui jơlan gah pơsir kông ngăn tơdơi kơ pơmut hrŏm. Ơi Đỗ Việt Hưng – Khua Gơnong bruă prăk kak tơring čar Gia Lai brơi thâo, Gơnong bruă glăk gum hrŏm hăng hơdôm anih anom pioh pel ĕp glăi abih bang kông ngăn hăng prăk pơkă mă yua, čih pơkra jơlan gah pơsir lăp djơ̆./.