Ơi Trần Quang Bình, pô wai lăng anom bơwih ƀong man pơdong ƀơi Dak Lăk, hơmâo 5 ring bruă glăk man pơkra, jing 5 ring bruă anai pơkra kaih mơn yua kơƀah čuah. Mah hyu hơduah tơña djŏp anih laih samơ̆ aka ƀu dưi mơn. Ơi Bình glăk bơngơ̆t biă mă yua anom bơwih ƀong mơ̆ng ñu amuñ hơmâo pô tuh pơ alin phak prăk yua ngă kaih:“Anom bruă glăk man pơdong hơdôm anih ƀơi Dak Lăk hăng Dak Nông. Hlâo adih, rim wơ̆t iâu rơdêh tuh čuah lĕ pô wai lăng čuah rai tuh brơi hlao mơtăm yơh, nua ñu năng ai 300 rơbâo prăk/m3. Hơdôm hrơi giăm anai, iâu nao hơdôm anih sĭ mơdrô čuah lĕ nua đĭ mơ̆ng 70-80% laih mơ̆ ƀu hơmâo čuah či blơi. Nua čuah pơmă đơi tui anai ƀu kơnong bơbeč sat kơ bruă man pơdong đôč ôh ăt ngă kaih bruă man pơdong dong. tơdah kah lĕ pô gơgrong tuh pơ alin phak prăk, anun jing rơkâo kơ hơdôm gơnong bruă, khul grup lăp đing nao kơ tơlơi anai”.

Tui hăng bruă hơmâo mơ̆ng ơi Trần Quang Bình lĕ bruă nua čuah pơmă ƀơi djŏp anih. Hyu krăo lăng ƀơi plơi prong Buôn Ma Thuột, hơdôm boh tơring glông Čư̆ M’gar, Krông Ƀuk, Ea H’Leo, plơi prong Buôn Hồ...brơi thâo čuah man pơkra đĭ mơ̆ng 70-80% nua laih, hơmâo anih đa pơmă 2 wơ̆t pơhmu hăng sa blan hlâo. Amai Tạ Bích Trâm, pô sĭ mơdrô gơnam man pơdong ƀơi phường Tân Lợi, plơi prong Buôn Ma Thuột, brơi thâo năng ai ñu 1 blan hlâo, nua čuah yŭ 300 rơbâo/m3, mông hơne rơbêh 500 rơbâo prăk/m3. Mah nua čuah pơmă kơtang kơtit, samơ̆ lu sang bơwih ƀong sĭ mơdrô gơnam man pơdong ăt kơƀah čuah, ƀu hơmâo čuah či sĭ:“Ră anai iâu arăng tuh čuah tơnap hloh, wơ̆t hăng sang sĭ mơdrô gơmơi hai tơnap mơn ƀu lăi dong tah ană plơi. Ha blan hlâo, kâo iâu lĕ arăng pơgiăng rai mơtăm yơh, nua čuah giăm 300 rơbâo prăk/m3, samơ̆ hơne rơbêh 500 rơbâo prăk/m3. Nua čuah pơmă tui anai jing tơnap biă hăng sang sĭ mơdrô gơmơi hăng mơnuih blơi či man pơdong sang dŏ. Mah nua pơmă tui anun, samơ̆ ăt ƀu hơmâo čuah lơi. Čuah ƀu hơmâo jing pơsơi pơsă, pơtâo, ximăng ăt ƀu thâo sĭ lơi, yua dah ƀu hơmâo čuah či luk jriu. Gơmơi jing dŏ dong ha anih, ƀu thâo anŏ ngă”.

Kơ bruă anai, sa čô khua Gơnong bruă hmua hăng ayuh hyiăng tơring čar Dak Lăk brơi thâo, phun tơhnal ngă nua čuah pơmă lĕ yua ia amăng ia krông trun, lu ƀat tô, song nan ƀu thâo nao rai kuăi čuah tui mơ̆ng hlâo. Rơngiao kơ anun, lu rơdêh nao rai pơkŏn abih laih hrơi pơkă brơi nao rai, glăk tơguăn ngă hră pơ-ar kiăng dưi nao rai tui tơlơi phiăn. Kiăng pơsir brơi bruă anai, Gơnong bruă kiăng hơdôm anom bruă hơmâo hră kuăi čuah kiăng ngă tañ, pơhlôm djơ̆ tơlơi phiăn đah mơ̆ng hơmâo djŏp čuah ba sĭ. Khă hnun, bruă ia krông thu jing tơnap biă mă, rim thun laih hơmâo ƀơi Dak Lăk; rơdêh nao rai hai ƀu djơ̆ abih bang lêng kơ abih hrơi pơkă nao rai ôh, anun jing kơƀah čuah man pơkra ngă kơ nua ñu pơmă ƀơi Dak Lăk năng ai yua mơ̆ng pơkŏn dong.

Trung tá Nguyễn Đức Duy - Kơ-iăng Khua anom bruă tơhan polih Bơwih ƀong, Kông an tơring čar Dak Lăk brơi thâo, lơ 5/5, Ding jum Kông an hơmâo mơ-it hră git gai kông an hơdôm boh tơring čar ƀôn prong lăng glăi abih bruă mă yua, pơgiăng hăng ba sĭ čuah, pơtâo añĕ amăng ia krông či ngă gơnam man pơdong. Anom bruă tơhan polih Bơwih ƀong glăk ngă hrŏm hăng Anom bruă tơhan wai lăng jơlan glông hăng Kông an hơdôm boh tơring hyu pel ĕp abih bang 21 anom bơwih ƀong kuăi čuah, pơtâo rơga ƀơi tơring čar. Khă hnun, bruă pel ĕp phun ñu lĕ kiăng ngă hơđong glăi bruă mă pơtâo čuah, pơdŭ pơgiăng hăng ba sĭ pơtâo čuah ngă sang. Mơnuih ƀôn sang lăi, bruă pel ĕp mơ̆ng anom bruă kông an ngă kơ anom bơwih ƀong pơdơi bruă, anun yơh ngă kơƀah čuah, čuah pơmă, tơlơi anai ƀu djơ̆ ôh:“Bruă pel ĕp anai kiăng ngă hơđong bruă kuăi čuah hăng sĭ mơdrô. Anom bơwih ƀong ăt dưi kuăi čuah, sĭ čuah tui tơlơi phiăn mơn. Tơdah amăng hrơi nao pel ĕp, gơmơi ƀuh anom bơwih ƀong ƀudah grup bơwih ƀong, pô hlơi thơ ngă soh, pioh pơƀut lui čuah či sĭ pơmă, ba truh tơlơi kơƀah čuah, jing ngă soh tơlơi phiăn, gơmơi bơtơhmal mơtăm yơh, hŭi kơ ba truh bruă čuah pơmă ča čot”.

Bruă kơƀah čuah bơbeč prong biă kơ bruă man pơdong anih anom ƀơi Dak Lăk, ngă kơ anom bruă bơwih ƀong mơdrô hăng mơnuih ƀôn sang tơnap biă mă. Nua čuah pơmă ƀu kơnong bơbeč kơ prăk apah đôč ôh mơ̆ ăt ngă kaih bruă man pơdong, ngă kơ lu sang sĭ mơdrô gơnam man pơdong tơnap tap. Mah anom apăn bruă gum lăi pơsir brơi laih bruă kuăi čuah, pơdŭ pơgiăng hăng ba sĭ, samơ̆ sit biă ñu kiăng hơmâo hơdră ngă bruă abih bang, sui thun, pơhlôm kiăng hơmâo čuah hơđong, huăi kơƀah čuah glăi dong. Amăng hrơi mông bruă man pơkra jai hrơi lu, bruă git  gai wai lăng anih sĭ mơdrô gơnam man pơdong rơđah rơđông tŭ yua jing tơlơi kiăng biă mă, đah mơ̆ng ngă bơkơnar tơlơi gêh gal kơ Kơnuk kơna, anom bơwih ƀong wơ̆t hăng mơnuih ƀôn sang./.