Ƀơi sang bruă djru ba mơnuih mơnam tơnap tap tơrin čar Gia Lai, bơyan pơdơi prong thun anai hơmâo tơlơi ngui ngor mơak tŭ yua biă mă brơi kơ 37 čô čơđai muai dưi hrăm tơlơi Anglê ƀu apah prăk, yua ƀing amai, ƀing ayong tơdăm dra mut phung nao djru pơtô ba. Rim kơ rơnuč rơwang hrơi tơjuh, ƀơi anih jơnum phun hmư̆ or or pơđok hăng pơhiăp tơlơi Angle hmư̆ mơak biă mă, wơ̆t hăng tơlơi pơphul ngui ngor tơdruă, pơhiăp rah tơlơi Angle. Amôn Nguyễn Trọng Phú, sa čô čơđai arăng čem rông ba amăng sang bruă djru mơnuih mơnam tơnap tap kah pơpha tơlơi hơ̆k mơak mơ̆ng ñu lơ̆m dưi hrăm tơlơi Angle hrŏm ƀing amai, ayong tơdăm dra pơyơr pran jua pơtô amăng bơyan pơdơi prong anai.

"Kâo hrăm mơ̆ng ƀing ayong, amai pơtô tơlơi Angle tui hluai akŏ bruă či lăi nao, kâo ƀuh mơak biă mă, hrăm tơlơi Angle mơak laih anun kâo amra gir run hloh hrăm kiăng thâo”.

Bơyan pơdơi prong thun 2025 ƀơi Gia Lai, djop sang bruă kơnuk kơna đing nao lu kơ bruă pơtrut pơsur pran jua wơ̆t gơnam tam hăng tơlơi djru ba ngă mơak kơ ƀing čơđai sang hră ƀun rin, čơđai sang hră mơnuih djuai ƀiă. Adơi Rčom H’Uyên, hrăm anih 7, sang hră gưl dua să Ia Phĭ, tơring glông Čư̆ Pah, brơi thâo:

“Sang anŏ gơmơi tơnap tap đơi, sang anŏ hơmâo anăn ƀun rin. Kâo hơmâo ƀing met neh khua mua pơ ala djru brơi prăk hrăm hră kâo mơak biă mă. Thun hrăm laih rơgao, kâo hơmâo anăn čơđai sang hră hrăm thâo thăi ƀiă, kâo amra gir run hloh dơ̆ng hăng săng gưt hiăp lu hloh”.

Tơring čar Gia Lai ră anai hơmâo giăm 5000 čô čơđai ƀun rin tơnap tap hăng rơbêh 95.000 čô čơđai amra hơmâo tơlơi hơdip djơh hăng ƀing anun. Hrŏm hăng tơlơi djru ba, gum tơngan hrŏm mơ̆ng ƀing khua mua, gong gai kơnuk kơna ƀơi să, čơđai muai tơnap tap ƀơi tơring čar hlăk dưi hơmâo anŏ gêh găl pioh pơđĭ kyar hlom bom drơi jăn pô. Yă Ksor Hiên-Kơ-iăng Khua Gơnong bruă ia jrao tơring čar, Khua Keh prăk djru pơgang čơđai muai tơring čar Gia Lai brơi thâo:

“Amăng Blan ngă bruă yua kơ čơđai muai, Gơnong bruă ia jrao ăt pơtum lu mơnuih, bruă mă kiăng pok pơhai ngă tui djru ba čơđai muai ƀun rin amăng đơ đam tơring čar kah hăng ƀơk gơnam, ƀơk prăk hrăm hră, djru rơdêh tang rơwang, gơnam yua hrăm hră, lăng ba ƀing čơđai muai ƀơi kual ataih tơnap tap. Ngă hrŏm djop gơnong bruă, sang bruă, plơi pla kơtưn pok pơhai ngă tui hơdră pơhlôm, pơgang tơlơi truh sat, ngă rơka rơkač, ruă nuă kơ čơđai muai hăng pơhlôm brơi sa bơyan pơdơi prong kơ čơđai muai ngui ngor mơak, rơnuk rơnua hăng tŭ yua”.

Ƀơi sang bruă gru grua tơdăm ngek dra muai tơring čar Dak Lak lu bruă mă amăng bơyan pơdơi prong thun 2025 kơdok kơdor mơak mơai. Ngă hrŏm jơlan hơdră anai, ƀing čơđai sang hră ngui pơphul hrŏm tơlơi ngui ngor đưm amăng plơi pla, hrăm pơčeh phrâo amăng tơlơi ngui ngor mơak, pơdă gơnam sĭ mơdrô yua čơđai muai pơphun laih anun tŭ mă gơnam arăng djru. Hrŏm hăng anun, jơlan hơdră anăn “Wa Hồ hăng ƀing čơđai muai, ƀing čơđai muai hăng Wa Hồ”, pơtô brơi bruă pơhlôm pơgang hŭi ƀlung ia kơ čơđai muai....ăt dưi hơmâo sang bruă gru grua pơphun brơi, pơhưč hơdôm rơtuh čô čơđai muai nao ngui hrŏm. Amai Nguyễn Thị Thúy Hiền, Kơ-iăng khua wai lăng sang bruă gru grua tơdăm ngek dra muai tơring čar Dak Lak brơi thâo, amăng tal anai amra hơmâo năng ai 30 mơta hơdră pok anih hrăm pơphun mơ̆ng mơguah truh pơ 9 mông tlam mơmŏt.

“Thun anai rơngiao kơ bruă djă pioh na nao hơdôm tơlơi pơtô hrăm kah hăng hlâo adih amăng tơlơi hrăm hră, adoh suang, pĕ gông atông brô̆, pơrơguăt drơi jăn, pơtô brơi hơdră dŏ dong ƀong huă rim hrơi ƀing gơmơi dŏ đing nao kơ lu bruă mă djru ba đôč đač kah hăng pơphun brơi anih dŏ ngui pơmin pơčeh phrâo, hrăm hăng ĕp lăng tơlơi ngui amăng ia rơgơi. Biă mă thun anai, ƀing gơmơi đing nao kơ bruă pơhlôm pơgang ƀlung ia hăng pơhlôm tơlơi truh sat, ruă nuă kơ čơđai, pơphun ngă tui lu bruă ngui ngor hăng jơlan hơdră ĕp lăng gru grua hiam kual Dap Kơdư”.

Ƀơi anih pơdah phim hăng pôr pơthâo djop mơta phim tơring čar Dak Lak, tal pơdah phim bơwih brơi kơ bơyan pơdơi prong brơi čơđai muai ĕp lăng hơmâo pơphun laih. Mơ̆ng ră anai truh abih lơ 24/8, rim mơguah hrơi năm hăng hrơi tơjuh, ƀing čơđai muai nao pơ sang pơdah phim sinema kiăng ĕp phim đôč đač ƀu apah prăk, phim amăng bruă pơtô hrăm, djơ̆ hăng hnơr thun ƀing čơđai muai. Yă Nguyễn Thị Hồng Thanh, Kơ-iăng Khua sang bruă pơdah phim brơi thâo, hăng 3 wơ̆t pơdah phim sa hrơi, sa wơ̆t ĕp djop brơi 400 boh grê čơđai muai dŏ lăng, hơmâo 20 mơta phim rup Việt Nam pơkra ming, hiam mơak biă mă, pơhưč pran jua čơđai lăng kiăng thâo kơ gru phun lŏn ia, tơlơi khăp sang anŏ, tơlơi rơnuk rơnua jơlan glông, pơhlôm hlâo tơlơi sat taih amang amăng sang hră, pơhlôm pơgang ƀlung ia ƀơi čơđai muai.

“Tal pơdah phim bơyan pơdơi prong lĕ sa amăng hơdôm bruă mă juăt pơphun na nao mơ̆ng sang bruă pơkra phim hăng pơdah prim tơring čar Dak Lak, kiăng akŏ pơjing anih anom ngui ngor mơak rơnuk rơnua kơ čơđai muai tơdơi kơ abih sa thun hrăm hră. Mơ̆ng bruă ĕp phim anun, arăng ruah lu mơta phim djơ̆ găl hăng hnơr thun ƀing čơđai muai, rơngiao kơ ĕp phim mơak, gơñu amra hơmâo tơlơi hrăm nao rai tơdruă lu mơta tơlơi hiam, bruă djơ̆, hơdip mơda mơak hloh laih anun thâo pơpŭ kơ tơlơi hơdip mơak ră anai".

Rơngiao kơ anih anom amăng ƀôn prong, tal pơdah phim bơyan pơdơi prong anai dŏ pơphun lu tal hyu pơdah phim amăng plơi pla kual ataih, kual asuek amăng tơring čar Dak Lak, hrŏm hăng anun hơmâo lu bruă mă pơtô hrăm hră djru đôč đač kơ ƀing čơđai muai, ba hyu hơdrôm hră pơđok, pơphun anih ngui ngor kơ ƀing čơđai muai...ngă gêh găl brơi čơđai ngui ngor mơak amăng bơyan pơdơi prong.