Kiăng dưi ngă lăng hlâo, hơdôm blan rơgao, Grup sa bah amăng hơmâo 5 čô yua Khua Jơnum min mơnuih ƀôn sang phường Nghĩa Phú, plơi prong Gia Nghĩa, tơring čar dak Nông gơgrong hlâo, khŏm gir run ngă bruă rơgao mông pơkă či pơkra abih hơdôm hră pơ-ar dŏ glăi, kah pơpha hră pơ-ar phara, jŭ yap ngăn hơdrăp...prăp či jao glăi hlâo či pơmut hrŏm. Amai Trần Thị Thu Hiền, mơnuih amăng Grup brơi thâo, mah hơmâo lu thun ngă bruă ƀơi anom bruă ƀôn prong Hồ Chí Minh hăng Dak Nông, samơ̆ ñu ăt sư̆ rơbư̆ mơn hăng tơlơi pơplih phrâo anai. Khă hnun, tơdơi kơ tal nao hrăm amăng lơ 13-14/6 phrâo rơgao, ñu thâo djŏp laih bruă kiăng ngă ƀơi anih mă bruă phrâo.

“Bruă ƀơi anih mă bruă hơđăp ƀudah phrâo ăt hnun mơn, yua dah anai lĕ bruă čơkă, ngă hră pơ-ar giong anun ba glăi laih anun ngă tui Kơčăo bruă mrô 06 kơ boh thâo mrô. Pơ anăp anai, bruă mă amra lu tui, samơ̆ yua juăt laih lơ̆m ngă bruă pơ phường hơđăp anun jing kâo pơmin dưi ngă mơn. Mah bruă lu hloh, ƀudah hơmâo bruă phrâo dong, samơ̆ ta gir ƀiă lĕ ta dưi ngă truh kih djŏp bruă hơmâo jao”.

Tui hăng bruă dăp glăi anom bruă kơnuk kơna tơring čar Dak Nông, hơdôm boh phường Nghĩa Phú, Nghĩa Tân hăng să Dak R’Moan amra hơmâo pơmut jing phường Nam Gia Nghĩa, sang bruă pơdong ƀơi mrô 2 Võ Văn Tần, phường Nghĩa Tân, jing anih mă bruă mơ̆ng Jơnum min mơnuih ƀôn sang plơi prong Gia Nghĩa hơđăp. Ơi Vũ Minh Nghĩa, Khua ping gah phường Nghĩa Phú brơi thâo, mơnuih mă bruă amăng gong gai phường Nam Gia Nghĩa hơmâo ruah mơ̆ng khua mua mơnuih mă bruă mơ̆ng Ping gah tơring čar, Ping gah plơi prong hăng 3 boh phường să hơđăp:

“Bruă mă tui hơbô̆ bruă phrâo, lông mă yua lăng hlâo ƀing Khua ping gah, Khua Jơnum min mơnuih ƀôn sang phường, Khua Jơnum min pơ ala mơnuih ƀôn sang hăng Khua Jơnum min djŏp djuai ania mơnuih mơnam Việt Nam phường amra gum ngă bruă tui tơlơi jao bruă sit nik. Rơngiao kơ anun, rim bruă mă lêng kơ hơmâo grup djru bruă pơphô brơi ngă tui hăng bruă hơmâo jao. Amăng mông ngă bruă tơdah hơmâo tơlơi aka ƀu hruaih lĕ amra jơnum glăi dong”.

Ơi Hoàng Công Hội - Khua ping gah phường Nghĩa Tân, plơi prong Gia Nghĩa brơi thâo, phường hơmâo lăng glăi abih bang gơnam yua truh kơ mơnuih mă bruă đah mơ̆ng jao glăi, dăp glăi tơdơi kơ pơmut hrŏm. Hơmâo năng ai 200 čô khua, mơnuih mă bruă ƀơi phường Nam Gia Nghĩa tơdơi kơ pơmut hrŏm. Bruă mă yua lăng phường phrâo kiăo tui djơ̆ tơlơi pơtô ba mơ̆ng Ding jum bruă čar hăng Kơnuk kơna.

“Tui hăng kơčăo bruă mơ̆ng plơi prong čih pơkra ăt kah hăng hơdôm tơlơi pơkôl pơkă, tơlơi pơtô ba mơ̆ng Ding jum bruă čar hăng Tơlơi pơtrun mơ̆ng Kơnuk kơna, hăng phường Nam Gia Nghĩa amra akŏ pơdong hơdôm anih mă bruă anun lĕ: Anom bruă pơkra hră pơ-ar; Anom bơwih ƀong huă - Anih anom plơi prong; Anom bruă gru grua - Mơnuih mơnam; hăng Anom wai lăng djŏp mơta bruă mơ̆ng kơnuk kơna. Hơdôm anom bruă djru bơwih brơi mơnuih ƀôn sang ăt hơmâo akŏ pơdong ƀơi hơdôm boh phường mơn či bơwih brơi mơnuih ƀôn sang klă hloh, djơ̆ hăng tơlơi kiăng”.

Tui hăng hơdră ngă bruă mơ̆ng gơnong dlông, mơ̆ng lơ 1/7 pơ anăp, tơring čar Dak Nông amra hrŏ trun mơ̆ng 71 jing 28 anom bruă gưl să, phường hăng pơmut hrŏm hăng Lâm Đồng phrâo. Hơdôm tơlơi gir run mơ̆ng rim boh să, phường hăng rim čô khua glăk ngă giong laih anom bruă kơnuk kơna mă bruă hơbôt, tŭ yua, hlom bom. Bruă ngă lăng hlâo hăng čih pơkra giong hơdră ngă bruă amra djru gong gai să phrâo mă bruă hơdeč hmar, klă hloh lơ̆m mă bruă sit nik./.