Anai jing sa amăng hơdôm boh să blung a mơ̆ng tơring čar Dak Lăk pơphun jơnum tơdơi kơ dăp glăi gong gai kơnuk kơna hăng akŏ pơdong gong gai 2 gưl. Să Hòa Phú hơmâo akŏ pơdong mơ̆ng bruă pơmut hrŏm să Hòa Phú, Hòa Khánh, Hòa Xuân hăng giăm 50.000 čô mơnuih. Amăng rơwang bruă phrâo, Ping gah să pơsit pơplih tơlơi bơwih ƀong huă tui jơlan mă yua boh thâo măi mok - akŏ pơjing - bơwih bơwang; đĭ kyar bruă ngă hmua yua boh thâo phrâo, plai ƀiă tơguan kơ prăk kơnuk kơna brơi, prăp rơmet mă pô hăng gum pơgôp glăi kơ tơring čar.

Pơtrut tui tơlơi gêh gal anun lĕ jơlan mut nao rai gah Dơnung tơring čar, Hòa Phú kiăng tuh pơ alin pơkra jơlan nao rai, anom bruă logistics, pơkra gơnam mơ̆ng hmua hăng măi mok phrâo, tuai hyu čuă anih anom glai klô, gir jing plơi prong mă yua boh thâo rơnuk phrâo amăng thun 2035./.