Lơ 5/8, Ping gah Khul tơhan 34 hơmâo Jơnum ruah khua ping gah tal sa, rơwang thun 2025-2030. Khul tơhan 34 hơmâo akŏ pơdong thun 2024, kiăo tui bruă pơmut hrŏm Khul tơhan 3 hăng 4, ngă bruă mơ̆ng kual Dap Kơdư truh pơ Ngŏ Dơnung dêh čar. Hrơi blan rơgao, Ping gah Khul tơhan 34 hơmâo prăp rơmet giong laih anom bruă, ƀơ ƀrư̆ pơsit tơlơi gơgrong bruă mơ̆ng sa anom bruă nao hlâo amăng khul tơhan blah ngă.

Mut amăng rơwang bruă phrâo, Ping gah Khul tơhan 34 pơsit pơƀut ngă 3 mơta bruă pơplih prong: pơđĭ tui anŏ klă bruă pơtŏp tơhan, pơtô bruă kơđi čar, wai lăng tơlơi pơmin hăng akŏ pơdong gru hiam Ling tơhan Wa Hồ amăng rơnuk phrâo; pơtrut akŏ pơdong tơhan sit nik, djơ̆ tui hơnong pơkă, kiăo tui tơlơi phiăn, pơtŏp tơhan rơgơi mơbruă, blah ngă kơtang, tŭ yua, pơplih bruă ngă hră pơ-ar hăng pơplih boh thâo mrô; laih dong gơñăm pơđĭ tui tơlơi rơgơi git gai mơ̆ng ƀing khua, pran blah ngă mơ̆ng ping gah hăng anŏ kjăp bruă mơ̆ng ƀing khua, mơnuih ping gah. Pơhiăp ƀơi mông jơnum, Thượng tướng Võ Minh Lương, Kơ-iăng khua Ding jum ling tơhan bơni kơ hơdôm boh than hơmâo ngă mơ̆ng Ping gah Khul tơhan 34 amăng rơwang bruă rơgao. Ƀơi anăp hơdôm tơlơi kiăng phrâo kơ bruă pơgang Lŏn ia hăng akŏ pơdong Khul tơhan kjăp bruă hloh, Kơ-iăng khua ding jum kiăng Khul tơhan akŏ pơdong anom bruă kjăp kơtang hloh; kơsem min boh thâo, lăi pơhmư̆ hăng Ding jum ling tơhan hơdôm hơdră blah ngă lăp djơ̆ hăng gong gai dua gưl./.