Hlâo kơ anun, Tơlơi phiăn Tuh pơ alin (čih pơkra glăi) hăng lu tơlơi pơplih yom, ngă hră amuñ hloh; ngă aset tui hơdôm pluh bruă sĭ mơdrô hơmâo tơlơi pơkă; kiăng ngă amuñ brơi hloh amăng bruă boh thâo ia rơgơi, pơčeh phrâo, bơwih ƀong mơtah; ngă gêh găl kơ anom tuh pơ alin mơ̆ng čar rơngiao...Khua mua ăt pơsit mă yua Tơlơi pơtrun ngă lăng hlâo hơdôm tơlơi pơkă, hơdră djru phara či ngă hơdôm kơčăo bruă pơprong, yom ƀơi plơi prong jưh jom Hà Nội; Tơlơi pơtrun čih pơkra, pơhrua tui hơdôm tơlơi pơkă, hơdră djru phara či đĭ kyar ƀôn prong Hồ Chí Minh; hơdôm tơlơi pơkă, hơdră djru phara đĭ kyar ƀôn prong Đà Nẵng.

Kơ hơdôm tơlơi pơkă, hơdră pơsir hĭ tơlơi tơnap, pơklaih brơi tơlơi gun amăng bruă mă yua Tơlơi phiăn Lŏn tơnah, Khua mua pơ ala mơnuih ƀôn sang pơsit mă yua Tơlơi pơtrun pơhrua tui hăng bruă Kơnuk kơna mă pơhrui glăi lŏn tơnah pioh kơ bruă pơgang lŏn ia, rơnuk rơnua hăng đĭ kyar bơwih ƀong huă - mơnuih mơnam, pơlir hăng kĭ brơi hơdră duh ba lŏn, djru ba, pơdong plơi phrâo, kah hĭ hơdôm bruă ječ đôč ƀu hơmâo ngă tui. Gah bruă ia jrao, tui hăng Tơlơi pơtrun mơ̆ng Khua mua, mơ̆ng lơ 1/1/2026, mơnuih ƀôn sang rin ƀơ ƀiă hăng ƀing tha mơ̆ng 75 thun truh pơ ngŏ dưi tla 100% prăk khăm pơjrao tơlơi ruă; ƀing ƀu hơmâo pô čem rông, drit druai, prăk aset hơmâo pơđĭ tui prăk dưi tla amăng hră pơhlom nua ia jrao. Mơ̆ng thun 2030 amra pok pơhai bruă lui hĭ prăk ia jrao amăng hơdôm mơta bruă pơkă pơjrao brơi đôč. Khua mua ăt pơsit mă yua Tơlơi pơtrun kĭ hră tuh pơ alin Jơlan hơdră dêh čar pơtrun kơ man pơdong plơi pla phrâo, hrŏ trun ƀun rin hơđong hăng đĭ kyar bơwih ƀong huă - mơnuih mơnam kual mơnuih ƀôn sang djuai ania ƀiă hăng čư̆ siăng rơwang thun 2026-2035; hrom hăng hơdôm tơlơi phiăn, tơlơi pơtrun yom pơkŏn dong.