Jơnum lok 10 pioh glăi tơlơi lăp hơdor prong biă hăng lu črăn tơlơi phiăn, tơlơi pơtrun hơmâo pơsit prong hloh kơ mơ̆ng hlâo truh ră anai. Bruă čih tơlơi phiăn mơ̆ng jơnum lok 10 hơmâo ngă rơđah Tơlơi pơtrun mrô 66 mơ̆ng Ding jum kơđi čar kiăng abih thun 2025 pơklaih brơi tơlơi tơnap gah tơlơi phiăn, 2027 tơlơi phiăn hơmâo mă yua bơbruai, huăi gun găn dong tah tui hơbô̆ bruă gong gai 2 gưl, thun 2028 ngă giong tơlơi phiăn tuh pơ alin, sĭ mơdrô, gum pơgôp ba anih anom tuh pơ alin mơ̆ng Việt Nam dong amăng grup 3 boh dêh čar ba akŏ kual ASEAN.

Kơ rơnoh đĭ kyar 2 mrô mơ̆ng thun 2026 pơdah pran jua kơtưn đĭ kơtang, gir run kơtang mơ̆ng abih bang anom bruă čar rơwang đĭ kyar phrâo mơ̆ng lŏn ia. Hơdră ngă bruă akŏ phun lĕ pơtrut đĭ kyar nao hrŏm hăng bong kjăp tơlơi bơwih ƀong, hơmâo tơlơi pơplih phrâo yom kơ tơlơi phiăn hăng akŏ pơjing anih tuh pơ alin sĭ mơdrô gêh găl, rơnuk rơnua hăng mơak klă. Kơnuk kơna kiăng pơtrut tañ bruă čih pơkra pơtrun hră pơ-ar pơtô ba hăng mă yua klă dưm kơnar ha amăng plĕ hơdôm tơlơi phiăn, tơlơi pơtrun hơmâo Khua mua pơ ala mơnuih ƀôn sang pơsit mă yua, pơhlom brơi hơdôm tơlơi pơkôl pơkă phrâo tañ mut amăng tơlơi hơdip mơda.