Ha blan tơdơi kơ gong gai să phrâo hơmâo pơphun ngă, tơlơi ngă bruă ƀơi Anom bruă bơwih brơi ngă hră pơ-ar să Mang Yang hơmâo ngă ječ ameč. Ƀing khua, mơnuih mă bruă pơ anai pơƀut abih mông čơkă hră, pơkra brơi, lăi glăi hơdôm tơlơi aka ƀu rơđah, hăng pơtô brơi ană plơi ngă hră pơ-ar. Ơi Lê Xuân Thiện - Khua jơnum min mơnuih ƀôn sang să Mang Yang, brơi thâo hră pơ-ar tơket tơkeng, ha kơnong, samơ̆ ƀing ngă bruă pơ sang să ăt kiăo hmao mơn:“Mrô hră pơ-ar kiăng pơkra lu biă mă, rơbêh kơ 1.000 pok hră. Hơdôm mơta hră pơ-ar hơmâo pơkra brơi djơ̆ hrơi pơkă, mơnuih ƀôn sang hok mơ-ak biă. Blung a phrâo ngă  lĕ ƀrô ngă bruă rah ƀrô hrăm kiăng juăt tui hơdră ngă bruă phrâo”.

Tơdơi kơ ha blan ngă bruă tui gong gai dua gưl, djŏp Anih bơwih brơi ngă hră pơ-ar ƀơi Gia Lai ngă bruă hơđong, nao bơbruai mơtăm yơh. Ƀing khua, mơnuih apăn bruă kơnuk kơna gir run, găn rơgao tơnap tap, tañ kiăo tui anih mă bruă phrâo, hrŏm hăng lu bruă hloh pơhmu hăng hlâo adih.

Tui hăng tơlơi lăi pơthâo amăn Glông bơwih brơi bruă dêh čar lơ 1/8, tơring čar Gia Lai glăk dong mrô 3/34 boh tơring čar, ƀôn prong kơ Mrô pơkă bơwih brơi mơnuih ƀôn sang hăng anom bơwih ƀong lơ̆m ngă hră pơ-ar, hăng 76,86 puang. Rơngiao kơ anun, tơring čar ăt dong mrô 6/34 kơ mrô hră pơ-ar phrâo hơmâo, laih anun hơmâo tŭ mă, pơkra brơi, hăng abih tih ñu 128.246 pok hră, amăng anun mrô hră pơ-ar mơ-it tui glông internet hơmâo 76,9%. Ơi Lê Dũng Linh - Khua anih pơplih phrâo hăng wai lăng bruă ngă hră pơ-ar, Anom bruă Jơnum min mơnuih ƀôn sang tơring čar Gia Lai brơi thâo, pơ anăp, tơring čar amra pơtrut mă yua ia rơgơi ană mơnuih pơčeh phrâo či djru ba ƀing khua, mơnuih mă bruă, pơtŏp pơhrăm bruă, pôr pơthâo...kiăng pơđĭ tui abih bang boh tŭ yua bruă mă mơ̆ng gong gai 2 gưl:“Gơmơi amra pơtô pơhrăm brơi dong kơ tơlơi pơkă, hơdră ngă bruă juăt hơmâo lu mơnuih ngă hloh mơ̆ hơmâo lu hră pơ-ar phrâo, nao hrŏm hăng pơphun jơnum pơčrông sai gưl tơring čar hăng să kiăng ĕp jơlan pơsir hĭ hơdôm tơlơi tơnap, dŏ đom. Tơdơi kơ pơtô pơjuăt, pơtŏp hrăm lĕ tơring čar amra pơtŏng glăi tui dua glông. Sa lĕ tui glông internet, dua lĕ brơi ƀing khua nao sem lăng. Mơ̆ng bruă hyu pel ĕp sem lăng anun, gơmơi amra pơtô brơi dong, djru hơdôm boh să ngă bruă dŏ sư̆ rơbư̆, aka ƀu hluh phuang kiăng gơñu ngă bruă bơbruai. Bruă anai amra sui truh abih thun 2025. Amăng thun 2026 khŏm hơmâo bruă ruah glăi dong ƀing khua, mơnuih mă bruă”.

Truh ră anai, Gia Lai hơmâo ngă giong laih anih anom mă bruă mơ̆ng tơring čar truh pơ să. Laih dong pơtrut kah pơpha, jao bruă 1.060 mơta bruă hơmâo jao glăi pơ sang să. Jơnum min mơnuih ƀôn sang tơring čar brơi hơdôm boh tơring dưi hơmâo djŏp tơlơi pơkă, akŏ pơdong anih mă bruă hăng lu mơta bruă kiăng ngă kah hăng: wai lăng ring bruă tuh pơ alin man pơdong, duh prăk lŏn pioh ngă jơlan, man pơdong anih anom, pơlar tui lŏn pioh pơđom lui, bruăi bơnư̆ pơđoh ia hăng djru ngă lu bruă kơnuk kơna pơkŏn dong.

Ơi Phạm Anh Tuấn - Khua Jơnum min mơnuih ƀôn sang tơring čar Gia Lai brơi thâo, hăng tơlơi thâo rơđah hơdôm tơlơi aka ƀu rơđah, dŏ gun pơ să, pơ anăp anai tơring čar amra djru rim boh să mơ̆ng 1-3 klai prăk či tuh pơ alin blơi gơnam, pơkra glăi anih anom; hơmâo lu tơlơi djru hăng ƀing khua phrâo pơkiăo nao mă bruă pơ anih phrâo, hrŏm hăng pơtô pơjuăt, pơtŏp brơi kiăng apăn bruă hloh; laih dong sem lăng hơdră pơkoăp nao khua mua mơ̆ng tơring čar glăi djru bruă pơ să, phường dŏ tơnap tap, pơhlôm ngă bruă kjăp, hơdeč, tŭ yua lơ̆m ngă tui bruă kơnuk kơna jao.

“Kơ gong gai dua gưl anun pơƀut ngă bruă blung a lĕ bơwih brơi ană plơi hăng anom bơwih ƀong, jing blung a anom bruă ngă hră pơ-ar khŏm ngă bruă bơbruai, tŭ yua, bơwih brơi klă. Dua lĕ khŏm kiăng jê̆ giăm hăng ană plơi, hmư̆ hing hăng pơsir brơi hmao tlôn mơtăm hơdôm tơlơi kiăng lăp djơ̆ mơ̆ng ană plơi hăng anom bơwih ƀong. Abih bang bruă mă mơ̆ng tơring čar hăng hơdôm boh să khŏm pơplih hơdră ngă bruă mơ̆ng wai lăng bruă kơnuk kơna, wai pơgang jing anom bruă kơnuk kơna pơplih phrâo, bơwih klă, pơčeh phrâo, mă ană plơi hăng anom bơwih ƀong yơh phun ñu, ngă gêh gal brơi kơ ană plơi hăng anom bơwih ƀong”.

Mah dŏ hơmâo ƀu ƀiă ôh tơlơi tơnap kiăng pơsir, pơklaih brơi, lu bruă kiăng pơplih glăi, samơ̆ mơ̆ng hrơi blan mă bruă blung a mơ̆ng gong gai să ƀơi Gia Lai brơi ƀuh tơring čar glăk nao djơ̆ jơlan laih. Hrŏm hăng tơlơi prăp rơmet hlâo mơ̆ng să, jao bruă kơ rim čô mơnuih, rim khul grup, hơmâo tơlơi gum ngă, krăp lăng mơ̆ng Jơnum min mơnuih ƀôn sang tơring čar dong. Yua hnun, bruă mă mơ̆ng hơdôm boh să glăk tŭ yua tui, ƀơ ƀrư̆ pơplih hơđong kjăp amăng bruă wai lăng plơi pla./.