Lơ 5/8, ƀơi Hà Nội, Khua dêh čar ơi Phạm Minh Chính pơhmư̆ mông Jơnum ruah khua ping gah Ding jum man pơdong tal Sa, rơwang bruă thun 2025-2030. Hăng tơlơi pơtrun ngă bruă “Gum pơgôp - Dưi ngă pô - Kiăo tui tơlơi pơkă - Pơlih prong - Đĭ kyar”, Ping gah Ding jum Man pơdong rơwang thun 2025-2030 pơsit 6 mơta bruă yôm phun: 3 mơta tơlơi pơplih prong amăng pơđĭ kyar anih anom, plơi prong hăng sang dŏ kơ mơnuih tơpuôl: ngă giong hơnong pơkă truh thun 2030 dêh čar ta hơmâo 5.000km jơlan rơdêh đuăi hmar; Kơsem min pơtruh nao rai abih bang bruă nao rai pơdŭ pơgiăng; biă ñu hơdôm tơdrun tum păn hăng jơlan rơdêh treng, jơlan prang; Pơtrut ngă giong bruă mna pơdong 1 klăk boh sang dŏ mơnuih ƀôn sang truh thun 2030 tui Akŏ bruă Kơnuk kơna pơtrun.

Pơhiăp ƀơi mông Jơnum, Khua dêh čar lăng yôm hăng bơni biă kơ tơlơi gir run kơtang hăng 9 mơta bruă tŭ yua yôm mơ̆ Ping gah Ding jum Man pơdong hơmâo ngă amăng rơwang bruă rơgao. Lăi nao hơdôm tơlơi tom găn rơgao, tơlơi thâo thăi kơđiăng lui, Khua dêh čar lăi nao dlăm kơ tơlơi gum pơgôp, dưi ngă hơdeč tui tơlơi pơplih phrâo hăng jao gưl ngă bruă, jao tơlơi dưi ngă bruă, nao hrŏm hăng pel ĕp, krăp lăng. Khua dêh čar kiăng ƀơi anăp lĕ rơnuč thun 2025 anai, khŏm man pơkra giong 3000km jơlan rơdêh đuăi hmar; gir ngă giong jơlan nao rai ter hang ia rơsĭ. Khua dêh čar ăt kiăng lăng yôm bruă jao glăi boh thâo măi mok phrâo, mơnuih mă bruă gah rơdêh treng hăng rơdêh treng đuăi hmar. Pơtrut ngă tañ, ngă klă plơi prong; đĭ kyar anih anom plơi prong tui rơnuk phrâo, mơtah, hơdjă, rơgơi, dưi bong glăi tơlơi pơplih ayuh hyiăng...