Bruă bơwih ƀong mơnuih mơnam tơring čar Dak Lak hmâo lu gru nam klă dong. Tơring čar Dak Lak glăk đing nao pơsir hơdôm tơlơi dô̆ gun amăng bruă gong gai 2 gưl, pơđĭ dlông bôh tơhnal črâo ba git gai, pơsir tơhnal ba tơbiă đĭ kyar 8% thun 2025. Jơnum min mơnuih ƀôn sang tơring čar Dak Lak brơi thâo, hrŏm hăng rơnoh đĭ kyar klă mơ̆ng bruă đang hmua, man pơdŏng, đang hmua, đang kyâo, akan hơdang hăng sĭ gơnam kơ dêh čar arăng lĕ, bruă rông hlô mơnong mơ̆ng tơring čar ăt ĕp glăi mơn tơlơi čang rơmang tơdơi kơ klin ruă dưi wai lăng klă.

Biă ñu, jơlan hơdră lŏm lui sang tơ̆i, sang pơdŏng mă jăng jai kơ mơnuih ƀun rin dưi pok pơhai khut khăt. Truh ră anai, abih bang mrô sang djru gum hmâo pơphun pơdŏng laih, rơbêh kơ 6.900 bôh sang pơdŏng giong jao glăi, hmâo giăm truh 78% mrô rơnoh, hrưn đĭ pơdŏng giong abih bang hlâo kơ 15/8. Tui hăng ơi Tạ Anh Tuấn, Khua Jơnum min mơnuih ƀôn sang tơring čar Dak Lak, khă tui anun, kiăng hmâo tơhnal pơkă pơđĭ kyar abih bang gơnam tam amăng tơring čar sa thun 8%, đĭ 8,64% amăng 6 blan rơnuč thun, ăt jing bruă jao tơnap biă. Kiăng dưi ngă tui tơhnal anai, blung hlâo khom pơtlaih hơdôm tơlơi gun amăng bruă mă mơ̆ng gong gai dua gưl; pơsir tơlơi akă gal, rơnoh bruă dŏng glăi ƀơi hơdôm rơwang bruă phun, hăng kơtưn đĭ pơsir prăk tuh pơplai bruă hrŏm./.