Rơwang hrơi tơjuh rơgao, amăng hrơi mông rŏng lŏn tơnah, amăng kual hăng ƀơi ia rơsĭ Ngŏ hơmâo lu tơlơi pơplih, wơ̆t hăng rung răng hơmâo mơn; klin covid-19 hơđuh đĭ, samơ̆ ƀing khua tơhan, ling tơhan amăng Ping gah ling tơhan tơring čar ăt krăp lăng, kiăo tui tơlơi phrâo hơmâo, ngă tŭ yua djŏp bruă hơmâo Ding jum ling tơhan, Quân khu 5 hăng Ping gah tơring čar Dak Lăk jao.

Rơđah biă ñu, ling tơhan hơmâo akŏ pơdong tui jơlan “Hơdeč, hơbô̆t, kơtang”, djŏp gưl ping gah, anom bruă ping gah amăng abih bang Ping gah tơhan lêng kơ gơñăm bruă akŏ pơdong tơhan blah ngă kơjăp kơđi čar, tơlơi pơmin; khua mua git gai ngă tŭ yua hơdôm bruă pơplih phrâo, pơplih glăi mơnuih mă bruă sit nik hơdeč, hơbô̆t, kơtang”; mă yua boh thâo ia rơgơi, pơplih tui boh thâo mrô.

Amăng rơwang bruă, Ping gah Anom bruă tơhan tơring čar Dak Lăk hmao tlôn akŏ pơdong, pơplih anih mă bruă, pơmut hrŏm hơdôm anom ping gah hăng grup mơnuih mă bruă sit nik mơ̆ng anom bruă; ngă tơlơi pơtrun, čih pơkra, pơhrua tui hăng ngă tui djơ̆ tơlơi pơkôl pơkă, hơdră ngă bruă, tơlơi jơnum ping gah djŏp gưl. Hơdôm hơbô̆ bruă “Ping gah 4 tơlơi klă”, “Grup ping gah 4 tơlơi klă, 3 tơlơi ƀu dưi ngă” hơmâo ngă tui tŭ yua.

Nao pơhmư̆ mông jơnum ruah khua, Đại tá Trần Minh Trọng - Kơ-iăng khua ping gah Quân khu 5 tŭ yap, bơni kơ hơdôm bruă mơ̆ Ping gah Anom git gai tơhan tơring Dak Lăk hơmâo ngă truh kih amăng rơwang bruă rơgao; ăt kah hăng bruă prăp lui jơnum ruah khua ping gah hăng pơphun truh kih 12 tal jơnum ruah khua grup ping gah amăng rơwang bruă 2025-2030 hăng čih pơkra Tơlơi pơtrun Jơnum ping gah tal anai. Kiăng dưi ngă tŭ yua Tơlơi pơtrun hơmâo ba tơbiă, biă ñu amăng hrơi mông pơmut hơdôm anom bruă, Kơ-iăng khua ping gah Quân khu 5 kiăng Ping gah Anom git gai tơhan tơring čar pơƀut ngă hơdôm bruă akŏ phun:“Pơƀut git gai, pơtô pơhrăm kiăng kjăp bruă blah ngă mơ̆ng ling tơhan tơring čar; bong kjăp, ngă tui na nao bruă prăp rơmet hlâo, kjăp bruă blah ngă, djơ̆ hăng tơlơi kiăng amăng djŏp tơlơi hơmâo phrâo. Ngă hrŏm hăng ling tơhan amăng kual thâo rơđah, lăi pơthâo hlâo, pơtŏng lăng djơ̆ tơlơi truh phrâo, hmao klôn pơkơdong glăi ƀing ngă soh, bong kjăp rơnuk rơnua mơnuih ƀôn sang. Pơphun pơtŏp pơgang pơhlôm hlâo amăng kual hrŏm hăng pơgang pơhlôm bruă hơmâo amăng plơi pla djŏp gưl kjăp hloh; ngă giong bruă pơkă hơnong, dưm dăp abih bang či đĭ kyar bơwih ƀong huă - mơnuih mơnam, mut hrŏm hăng bruă pơhlôm pơgang hăng abih bang mơnuih ƀôn sang gum pơgang lŏn ia”.

Ơi Nguyễn Đình Trung, Khua ping gah tơring čar, Khua ping gah Anom git gai tơhan tơring čar Dak Lăk brơi thâo, Tơlơi pơtrun mơ̆ng mông Jơnum ruah khua hơmâo pơsit hăng tơlơi pơmin “Tơlơi dưi dưm kơnar - Gum pơgôp - Rơgơi  - Pơplih phrâo - Đĭ kyar” hăng akŏ bruă “Pơtrut tui gru đưm tơhan blah ngă tơring čar Dak Lăk sông kơtang”; pơƀut akŏ pơdong Ping gah hơdjă rơgoh, kjăp kơtang; tơhan blah ngă tơring čar kjăp phik amăng djŏp bruă, ba gru hlâo, hmư̆ hing rơgơi mơbruă; gir ngă truh kih bruă hơmâo jao amăng bruă wai pơgang kjăp Lŏn ia Việt Nam xã hội chủ nghĩa amăng rơnuk phrâo”. Ơi Nguyễn Đình Trung kiăng abih bang Ping gah pơphun ngă tui Tơlơi pơtrun jơnum ping gah.“Pơƀut git gai črâo bruă hăng pran blah ngă; bong kjăp tơlơi pơmin pran jua hiam, hơdip hiam; pơtrut tui tơlơi dưi mơnuih ƀôn sang ngă pô, dưm kơnar, gum pơgôp, mut hrŏm; ha pran jua gir ngă truh kih Tơlơi pơtrun jơnum ruah khua ping gah ba tơbiă. Khul khua apăn bruă git gai Ping gah rơwang bruă phrâo amra tañ čih hơdră ngă bruă, hrăm hră, lăi pơthâo brơi abih bang Tơlơi pơtrun jơnum ping gah anai kơ abih bang ƀing khua, mơnuih ping gah, ling tơhan blah ngă amăng tơring čar; čih pơkra hơdră ngă bruă tong ten, ƀơ ƀrư̆ ngă tui. Hơdôm khul grip gir juh alum, iâu pơthưr mơnuih mă bruă amăng khul kơtưn hloh, gir ngă giong djŏp rơnoh pơkă, tơlơi gơñăm nao mơ̆ Tơlơi pơtrun Jơnum ping gah ba tơbiă”./.