Tui hăng khua mua pơphun bruă mă, hơdôm tơlơi hlăk ƀuh rơđah hră pơhing pôr pơthâo hrơi blan rơgao, lăi nao bruă pok pơhai bruă mă kơnuk kơna 2 gưl ƀơi tơring čar, anŏ aka ƀu găl ƀơi hơdôm ring bruă čuk pơkra jơlan, bruă wai lăng gơnam yua man pơdong, klin kheng pơtah čroh ƀơi un, bui hăng tơlơi măt mơnong ƀong huă ngă lu mơnuih ruă, yua ƀong ƀañ mi ƀơi să Mdrak.

Kơ boh tơhnal anai, khua mua djop Gơnong bruă, sang bruă pơdjơ̆ nao hơmâo lăi pơthâo rơđah rơđong hăng hơmâo hơdră pơsir djơ̆ lăp. Pơdjơ̆ nao tơlơi čih anăn  "Tơnap tap hơmâo dơ̆ng tơdơi kơ 15 hrơi ngă tui gong gai kơnuk kơna dua gưl ƀơi Dak Lak", hơmâo čih pôr amăng sang bruă VOV, khua mua amăng tơring čar pơtong rơđah VOV lăi pơthâo djơ̆ tơlơi hơmâo. Ơi Nguyễn Tự Do, Kơ-iăng khua jơnum min mơnuih ƀôn sang să Quảng Phú brơi thâo, hơdôm tơlơi tơnap mơ̆ hră pơhing phrâo hơmâo pôr, hơmâo pơsir laih, bruă mă ƀơi să ră anai hơđong mơ̆n. Ƀơi mông jơnum hăng ƀing čih tơlơi pơhing, khua mua tơring čar Dak Lak ăt pôr pơthâo kơ lu hơdră ngă tui anŏ gêh găl bơwih ƀong huă, biă mă ñu anŏ gêh găl mơ̆ng ia rơsĭ, đĭ pơ glai klô hăng akŏ bruă pok pơhai lu ring bruă yom.