Kiăng djơ̆ tui tal pơplông, Dak Lak hmâo prăp lui ha amăng plĕ, mơ̆ng anih anom gơnam tam, bruă mă gah tlôn, tơlơi hơgom akô̆ tơlơi pơplông truh djru čơđai kual tơnap tap. Glăk amăng rơwang jao hơdră bruă gong gai plơi pla hơdai nao 2 gưl, bruă prăp lui kơ pơphun tal pơplông ăt dưi hmâo hơdôm bôh anom bơdjơ̆ nao biă ñu đing nao.

Tal pơplông mă ƀăng gưl 3 thun anai, tơring čar Dak lak hmâo rơbêh kơ 22.600 čô čơđai ngă hră rơkâo pơplông, hăng 949 bôh anih pơplông dưi pơpha ƀơi 33 bôh anih anom pơplông. Gơnong bruă pơtô pơhrăm tơring čar hmâo gum hrŏm hăng hơdôm bôh anih anom iâo pơhrui rơbêh kơ 3.000 čô mơnuih apăn bruă, nai pơtô, mơnuih mă bruă ia jrao, khul tơhan pơgang rơnuk rơnua... gum hrŏm pơphun tal pơplông. Hơdôm anih pơplông hmâo pel ĕp glăi anih anom, gơnam tam, dưm truă camera lăng tui, pơhlôm hơdôm tơlơi kiăng kơ bơngač rơđah, măi pưh hâ̆o, kơƀang grê hăng anih pơplông pơhlôm hlâo. Gơnong bruă ăt gơgrong hlâo mơn bruă pok pơhai in tơglit hăng ba hyu akô̆ tơlơi pơplông, biă ñu amăng mông thun anai hmâo dua djuai akô̆ tơlơi pơplông mă yua kơ dua jơlan hơdră pơtô pơhrăm phara./.