Thun 2021, plơi thôn 3, să Ea Bung, hơmâo tơlơi bơrơsua nao rai hnoh ia pling nao pơ hmua. Hơmâo hơdôm sang anŏ pơ hlao ia, nao pơgăn bư̆ hĭ hnoh ia pling nao amăng hmua kơ abih bang yua hrŏm 30 thun hăng anai, ngă kơ lu sang anŏ pơkŏn hơmâo hmua gah tơkai ia adih anun ƀu djop ia dơ̆ng tah kơ hmua pơdai ƀing gơñu, yua anun pơdai ƀu mơboh, truh bơyan lui soh sel, juăt rơngiă bơyan. Tơlơi pơdjơ̆ sao nao rai anun sui laih, lu sang anŏ bơjak nao pơ să brơi pơsir, samơ̆ ƀu hơmâo boh tơhnal lơi hăng tơlơi pơdjơ̆ sao mơ̆ng hơdôm sang anŏ jai hrơi kơtang laih anun ba truh rung răng plơi pla. Truh lơ 3/7 phrâo laih rơgao, tơdơi kơ hrơi gong gai kơnuk kơna să phrâo akŏ pơdong, hơdôm sang anŏ mơnuih ƀôn sang ngă hră rơkâo pơsir, bơjak nao pơ să pơhaih kơđi hơmâo, Tơdơi kơ hmư̆ dua bơnah mơnuih ƀôn sang rôk ruai, khua mua să Ea Bung hăng ƀing apăn bruă wai lăng bruă jao, nao tơl anih hơmâo tơlơi, mă bruă tong ten, rơđah rơđong hăng hơdôm sang anŏ laih anun ĕp hơdră djru pơsir brơi. Kơnong amăng 2 mông đôč rôk ruai, djop mơta tơlơi gun, rung răng hơmâo pơsir abih ƀhiao, 4 boh sang anŏ bơ tŭ ư kah pơpha ia pling nao pơ hmua ƀing gơñu, pơdjru pơkra ming glăi hnoh ia kiăng ia rô klă. Hơmâo hmua pơ tơkai ia adih anun, yă Lê Thị Liên, mơnuih ƀôn sang thôn 3 lăi:

 “Khua mua amăng să tong ten, jĕ giăm hăng mơnuih ƀôn sang, bơni kơ ƀing gơñu hơmâo djru, pơsir brơi kơ ta kiăng mă bruă mơak pran jua, ră anai hơđong laih, glăi kah tơđar, pok ia yua hrŏm hơbit mơak tơdruă”.

 Tơlơi pơdjơ̆ sao sui truh 4 thun kah mơ̆ng dưi pơsir aka ƀu abih 2 mông ôh, sir baih, yua hăng hơdră ngă phrâo jĕ giăm mơnuih ƀôn sang hloh, prăp lui bruă mă, ĕp lăng kiăng thâo tong ten tơlơi pơhing, nao lăng tơl anih hơmâo tơlơi pioh bưp nao rai rôk ruai hĭ laih anun djru pơsir. Tui hăng ơi Đỗ Duy Toại, Khua jơnum min mơnuih ƀôn sang să Ea Bung, tơdơi kơ gong gai kơnuk kơna să dưi akŏ pơjing phrâo, tui hluai kơnuk kơna dua gưl, abih glông bruă kơđi čar amăng să hơmâo pơphun tañ dăp akŏ bruă “100 hrơi blung a mă bruă, jak iâu jĕ giăm mơnuih ƀôn sang, lăng kơ mơnuih sang yơh phun”.

 Să hơmâo akŏ pơjing lu grup hyu mă bruă nao tơl 3 boh plơi pla hơmâo lu tơlơi hlăk rung răng ƀu mơak nao rai yua lŏn tơnah, ngă rung răng, pioh bưp gơñu pơđing hmư̆ tơlơi pơgôp hiăp laih anun pơsir hĭ djop bruă mă.

 “Rơngiao kơ bruă ngă amăng sang bruă lĕ khom nao truh pơ plơi pla đing hmư̆ tơlơi lăi pơthâo mơ̆ng mơnuih ƀôn sang, hơdôm tơlơi mơnuih ƀôn sang ƀu mơak ôh mơ̆ng hlâo aka ƀu pơsir ôh đing nao pwosir hlâo. Rơgao 22 hrơi mă bruă lĕ să hơmâo mă bruă hăng 3 boh plơi pla. Anun yơh bruă ngă jĕ giăm mơnuih ƀôn sang, tong ten hăng pơsir bruă ječ ameč, rơđah rơđong truh pơ mơnuih ƀôn sang, tơlơi anai yom biă mă. Ƀu lăi ôh kah hăng hlâo dŏ ha dơnong đôč amăng anih mă bruă đôč, tơguan mơnuih ƀôn sang nao rơkâo, lăi pơthâo kah ta mơ̆ng thâo...."”

Hrŏm hăng anun, tơlơi mă bruă phrâo, Ea Bung ăt pơhaih ƀu ƀiă ôh tơlơi tơnap. Sang bruă ră anai hơmâo man pơdong djop brơi ƀu truh 30 čô mơnuih mă bruă ôh, ră anai khom glăm ba bruă mă kơ 70 čô mơnuih apăn bruă, lơ̆m anun gơnam yua mă bruă bơwih brơi kơ bruă aka djop. Ơi Nguyễn Văn Phú, Kơ-iăng khua jơnum min mơnuih ƀôn sang să, wai lăng gah bruă hră pơar, kah pơpha:

“Mơta sa lĕ gơnam yua mă bruă, măi mok, hrĕ dăng kông hăng hơdôm bruă mă pơsir dơlăm hloh aka ƀu djop ôh. Laih dơ̆ng, ƀing apăn bruă lơ̆m dăp glăi aka ƀu hơmâo pơtô hrăm hlâo ôh ngă tui bruă phrâo....Hrĕ apui lơtrik ƀu anăm pơkĕ yua ôh, anun yơh CP anŏ pơkĕ pơkrem apui apui jă či tơ̆i hrĕ hơmâo na nao đôč, bơbeč truh bruă mă, rơngiă mông mơnit biă mă lơ̆m ƀing apăn bruă pơsir bruă mă, ngă hră pơar kơ ană plơi pla”.

Hơdôm tơlơi aka ƀu găl anai dưi hơmâo să lăi pơthâo hăng khua jơnum min mơnuih ƀôn sang tơring čar lơ 23/7. Tơlơi ƀuh ƀô̆ mơta hmao kru mơ̆ng khua mua tơring čar, trun nao tơl să đing hmư̆ tơlơi lăi pơthâo mơ̆ng kual yŭ, kual plơi pla, ƀuh rơđah bruă ngă prăp hlâo mơ̆ng gong gai kơnuk kơna dua gưl, abih bang anăp nao kơ mơnuih ƀôn sang. Ơi Tạ Anh Tuấn, Kơ-iăng khua git gai ping gah, Khua jơnum min mơnuih ƀôn sang tơring čar Dak Lak lăi:

 "Ƀing gơmơi hlăk pơtrun hiăp kơ Gơnong bruă Boh thâo ia rơgơi jŭ yap glăi abih bang gơnam yua mă bruă hăng hơdră pơblih phrâo ba yua mrô ƀơi tơring čar kiăng hơmâo hơdră tuh pơ alin laih anun pơđĭ tui gơnam yua mă bruă. Gah sang  dăng kông lĕ jao kơ Anom bruă jơnum min mơnuih ƀôn sang tơring čar nao mă bruă hăng anŏm bruă sang dăng kông hăng sang bruă apui lơtrik kiăng dăng hrĕ prong hloh djop apui lơtrik pơkĕ yua. Anih pơpă hơmâo mơnuih ƀôn sang dŏ, khom dăng nao hrĕ apui lơtrik dêh čar hăng pơkĕ djop hrĕ dăng kông ba tơlơi pơhing pơhiăp telephôn djă hyu kiăng huăi hơmâo anih dơlăm ƀu dưi pơkĕ yua telephôn djă hyu”.

 Tơdơi kơ 3 wơ̆t hrơi tơjuh pơphun bruă mă gong gai kơnuk kơna dua gưl ƀơi gưl pơyŭ, plơi pla, kual ataih să Ea Bung hlăk mưn ƀuh rơđah tơlơi pơblih phrâo mơ̆ng gong gai kơnuk kơna phrâo ƀu kơnong dăp glăi sang bruă, khul mơnuih apăn bruă  hơbôt đôč ôh, dŏ pơblih hơdră mă bruă, jĕ giăm, pran jua puăi tlao, tŭ jum mơnuih ƀôn sang pioh mă bruă, pơsir bruă. Rim kơ sa bruă hơmâo dưi ruh yaih, pơsir hĭ, rim tơlơi pơhing râ̆o pơhmư̆ đing nao hmao kru, anun yơh kơnôl ƀuh rơđah tơlơi djơ̆ mơ̆ng hơbô̆ bruă kơnuk kơna dua gưl ƀơi tơring čar lơ̆m pơphun sang bruă, khul mơnuih mă bruă ƀiă hăng hơbôt hloh, samơ̆ jĕ giăm hăng ană plơi, yua kơ ană plơi pla mơnuih ƀôn sang yơh sit mă bruă.