Tơdơi kơ hơmâo tơlơi truh ia ling dăo, yua hơmâo prăk pioh djru, Jơnum min mơnuih ƀôn sang tơring čar Khánh Hòa pơsit brơi djru rĭm čô mơnuih ƀôn sang hơmâo sang ia dăo abih lĕ 1 klăk prăk sa boh sang anŏ. Rơngiao kơ anun, čơđai sang hră mơ̆ng gưl sa pơngŏ, dưi djru dơ̆ng 800 rơbâo prăk sa čô.

Truh ră anai, Gơnong bruă prăk kăk tơring čar Khánh Hòa hơmâo jŭ yap hăng pơpha brơi 445 klai prăk pioh kơ djop să, plơi pla djru mơnuih ƀôn sang. Khua Jơnum min mơnuih ƀôn sang tơring čar ơi Trần Phong brơi thâo, ƀing khua mua ƀơi djop să, phường hlăk pok pơhai bruă mă hmar kah hăng: nao rŭ glăi anŏ răm ƀăm ia ling dăo ngă, pok pơhai tơlơi bơwih ƀong huă kơ mơnuih mơnam, pơsir hơdôm tơlơi či kiăng ječ ameč kơ mơnuih ƀôn sang…Khă tui anun, bruă djru prăk kơ mơnuih ƀôn sang lĕ kiăng ngă tui ječ biă mă. Ơi Trần Phong pơtă pơtăn, tơdah pok pơhai kaih lĕ amra ngă tơdu hĭ tơlơi đăo kơnang bruă djru tơlơi khăp pap kơ mơnuih ƀôn sang.