Hơjan prong gah hlâo ia, ngă kơ ia krông Luỹ tŭ kơ blai đĭ, ngă dăo giăm 800 boh sang ƀơi să Lương Sơn, tơring čar Lâm Đồng hăng ngă kơ jơlan rơdêh đuăi hmar Phan Thiết - Dầu Giây găn nao pơ să Tân Lập dăo abih. Kơnong tơlơi truh tơhlŏm čư̆ ƀơi jơlan čun čoe Mimosa (Jơlan prong mrô 20), ling tơhan ječ ameč ba nao rơdêh, măi mok, truh yang hrơi dong lơ 4/12 hơmâo rơmet, kor lŏn pơtâo, laih anun brơi rơdêh dưi nao rai dua glông laih. Tơring čar Lâm Đồng glăk krăp lăng ayuh hyiăng, lăng glăi abih anih amuñ bưp tơlơi truh, pơhlom rơnuk rơnua kơ neh wa hăng bong kjăp bruă nao rai bơbruai ƀơi hơdôm jơlan yom phun.

Mơguah lơ 4/12 tom brơi, ia ling dăo ƀơi ia krông Cái Nha Trang ăt đĭ glăi tơdơi kơ sa mlam hơmâo hơjan, ngă kơ lu plơi pla treng hang ia krông ia lip kơtang. Ia krông rô mơ̆ng hlao ih, kual čư̆ siăng tơring čar Khánh Hòa, rô trun pơ bah ia krông hăng ia rơsĭ Nha Trang, ia čơkol plŭk, rô kơtang, lip nao amăng plơi pla, truh pơ djop sang añ mơnuih ƀôn sang ia dăo mlĕp. Mơnuih ƀôn sang dŏ ƀơi dua bơnah hang ia krông khom tơbiă đuăi pô, ƀing tha, čơđai muai hăng pơdŭ dram gơnam kông ngăn, rơdêh ôtô nao pơ anih hang kơdư ƀiă. Ƀơi phường Nha Trang, tơhan kông an, tơhan plơi, hlăk ai kơsung nao, hyu pôr pơhiăp hăng mikrô, počrâo brơi anih mơnuih ƀôn sang đuăi kơ ia ling dăo, kiăng hmao kru. Lu arăt jơlan ƀơi anih lŏn čor dăo, ia lip, puh nao, ƀu thâo rô nao rai dơ̆ng tah, tơnap tap biă mă.