Pơgiăng nao ană hrăm hră, hrơi blung a ƀơi sang hră gưl muai Sao Mai-ring bruă phrâo man pơdong yua kơ Binh đoàn 15 (Ding jum ling tơhan) pô gơgrong man pơdong hăng jao glăi kơ să Ia Krêl, tha plơi ơi Rahlan Vọng, dŏ ƀơi plơi Ngol Ale ƀu pơdŏp ôh tơlơi mơak amăng pran jua ñu. Sang hră phrâo man pơdong hiam biă mă, amăng anun hơmâo 5 anih hrăm, hơmâo sang juă glai, sang apui jing anih huă ƀong amăng lăm, anih hrăm hră, anih ngui ngor, anih rơjang drơi jăn, anih dưm rơdêh ƀing nai pơtô…dưi djop brơi kơ 300 čô čơđai mut hrăm hăng ngui ngor. Hrŏm hăng gơnam yua, anih hrăm hiam, djop mơta gơnam djă ngui, gơnam pơtô hrăm pioh kơ čơđai gưl muai hơmâo djop laih, lăng anun kah hăng sa tơlơi čang rơmang prong biă mă kơ čơđai muai mơnuih djuai ania ƀiă, wơ̆t amĭ ama čơđai muai, yua  abih bang hơđong pran jua yơh lơ̆m mơ-it ană bă mut hrăm amăng sang hră phrâo man pơdong hiam djơh hăng anai, djru ngă hơđong ƀơi kual giăm guai dêh čar.

 “Sang hră hiam, rơgoh hơdjă, ană bă ƀing gơmơi dưi mut hrăm dŏ glăi đih pit ƀong huă mơak yơh, hrăm hră tŭ yua, čang rơmang dĭ da gla kơñ ƀing gơñu prong đĭ bơwih brơi bruă čar, lŏn ia ta pô. Ƀing gơmơi hơ̆k mơak biă mă hăng đăo kơnang hơđong pran jua kơ Ping gah hăng kơnuk kơna, yua hơmâo đing nao, djru ba kơ ană amôn, čơđai muai, tŭ yua klă kơ kơñ pơgi anai”.

 Ƀu kơnong ƀơi Ia Krêl đôč ôh, ƀơi 7 boh plơi pla să Ia Mơ, Ia Puč, Ia Nan, Ia Dom, Ia Čiă hăng Ia O, tơring čar Gia Lai hơmâo pơphun man pơdong sang hră đôm lăm dua gưl, gưl I hăng gưl II, hơmâo 212 boh anih hrăm, abih tih rơnoh prăk tuh pơ alin lĕ 1.516 klai prăk. Tui hăng anŏ pơkă rup man pơdong, djop sang hră anai dưi man pơdong sa hnơ̆ng đôč hơmâo djop anih pơtô hrăm hăng gơnam yua, atur ngă sang, jơlan glông, lan sang hră, anih hrăm hăng anih pioh ngui ngor rơjang drơi jăn hơmâo djop djel soh, kiăng hơđong brơi djop rơbêh 7.000 čô čơđai sang hră, lu kơ čơđai sang hră mơnuih djuai ƀiă hrăm. Amôn Rčom Lan Thúy, čơđai sang hră anih 8D, sang hră gưl dua Phan Bội Châu, să Ia Nan brơi thâo:

“Kâo mơak biă mă yua dah kơñ pơgi dưi hrăm hră ha hrơi tlam mơguah mơtam. Amăng sang hră hơmâo djop anih hrăm, pơtop rơjang drơi jăn, ngui ngor mơak laih anun hơmâo anih hrăm ngă tui, kơsem min gah put jrao hoá học, hrăm kơsem min gah vật lý laih anun dưi huă ƀongdŏ glăi yang hrơi dong ƀơi sang hră, gêh găl kơ amĭ ama huăi pơgiăng nao rai pơ sang hră”.

Ră anai, tơring čar Gia Lai hơmâo giăm 200.000 čô čơđai sang hră mơnuih djuai ƀiă hlăk dŏ hrăm ƀơi djop gưl hrăm lu biă mă ñu čơđai sang hră djuai ania Jarai, Bahnar, Hrê….Ơi Phạm Văn Nam-Khua Gơnong bruă Pơtô hăng Pơjuăt tơring čar Gia Lai brơi thâo, kiăng pơđĭ tui boh tŭ yua pơtô hrăm ƀơi kual plơi pla mơnuih djuai ƀiă dŏ hăng ƀơi kual giăm guai dêh čar, tơring čar hlăk ngă hrŏm bruă man pơdong giong sang hră lĕ ăt čih pơkra tơlơi phiăn pơkă kơ buă mă djơ̆ găl pioh kơ ƀing nai pơtô, kiăng lăp hăng pơ kual ataih, tơnap tap. Hrŏm hăng anun, pơ anăp adih, Gơnong bruă amra lăi pơthâo Khul pơ ala mơnuih ƀôn sang tơring čar ngă hră pơtrun djru ba čơđai sang hră kual tơnap tap hloh; laih dơ̆ng pơblih jơlan hơdră djru ba kiăng kơ ƀing nai pơtô hrăm hră hơđong pran jua sui thun pơtô ƀơi kual ataih, kual asuek. Hrŏm hăng hơdră pơsir anun, tơring čar hlăk pok pơhai akŏ bruă pơđĭ tui boh tŭ yua man pơdong sang hră đôm lăm hăng čem rông amăng tơhrơi čơđai sang hră dŏ glăi huă hrơi dong ƀơi sang hră mơ̆ng thun 2025-2030, kiăng djă pioh mrô čơđai hrăm hơđong na nao, pioh kơ čơđai sang hră ƀun rin, giăm ƀun rin.

“Anai lĕ jơlan hơdră prong ba glăi boh tŭ yua mơ̆ng Ping gah hăng kơnuk kơna ta, kiăng pơđĭ tui tơlơi thâo, bruă pơtô hrăm kơ mơnuih ƀôn sang, đah mơ̆ng hơmâo mơnuih ngă khua apăn bruă tơdơi adih amăng kual plơi pla djuai ƀiă, kual giăm guai dêh čar. Kơnang kơ bruă pơđĭ tui boh tŭ yua glông bruă kơđi čar pơgang hơđong tơlơi rơnuk rơnua ƀơi plơi pla, jơlan hơdră pioh kơ mơnuih djuai ƀiă, khul gum pơgôp djuai ania kiăng hơđong amăng kual guai dêh čar”.

Hơdôm boh sang hră lăng hiam phrâo man pơdong ƀơi kual mơnuih djuai ƀiă dŏ hăng ƀơi guai dêh čar brơi ƀuh tơlơi đing nao djru kơ bruă pơtô hrăm mơ̆ng ping gah hăng kơnuk kơna ta pioh kơ kual ataih tơnap tap prong biă mă. Anai yơh jing anih ưh kơnang kơjăp djru čơđai sang hră mơnuih djuai ania ƀiă hơmâo anih hrăm, gơnam yua hrăm hră pơar djop djel, djru kơ bruă man pơdong kơjăp kual giăm guai dêh čar hơđong na nao, pơđĭ kyar ƀơi tơring čar Gia Lai.