Rĭm hrơi, amon Lang Thị Yến Vy, čơđai sang hră hrăm anih 7, sang hră gưl dua Nguyễn Thị Định, să giăm guai Ia Rvê, tơring čar Dak lak găn rơgao jơlan nao rai rơdêh 10 km kiăng kơ nao hrăm hră. Lơm thâo ƀơi sang hră ñu glăk hrăm amra man pơdong sang hră pơprong ƀiă hăng yôm hloh lĕ hơmâo anih dŏ glăi, Yến Vy hok mơ-ak biă mă:

“Jơlan nao rai mơng sang truh pơ sang hră giăm 10 km. Amăng bơyan hơjan ia dăo, anun kâo juăt đuăi dar ataih mơng 14-15 km. Bơyan không phang pơ-iă hang hăng amruih amrăm anun nao rai glêh glar biă mă, lơm glăi truh pơ sang ƀu mơhao ƀong gơnam dong tah. Lơm thâo sang hră gơmơi amra man pơdong phrâo kâo hok mơ-ak biă mă. Čang rơmang hơmâo sang hră phrâo kiăng ƀing gơmơi dưi hrăm klă ƀiă dong”.

Tơlơi bơră ruai mơng amon Yến Vy ăt lĕ tơlơi čang rơmang mơng hơdôm rơtuh čô čơđai sang hră hăng ƀing amĭ ama kual giăm guai Dak Lak amăng hơdôm thun rơgao: tơlơi bơwih ƀong huă tơnap tap, bruă hrăm hră bưp lu tơnap tap. Mơng hơdôm tơlơi rơkâo anai, tơlơi črâo trun tuh pơ alin man pơdong hơdôm boh sang hră kơnuk kơna čem rông ba pơlir gưl I-gưl II ƀơi hơdôm boh să giăm guai hơmâo pok pơhai, pok rai tơlơi čang rơmang phrâo brơi kơ bruă pơtô hrăm ƀơi kual giăm guai tơring čar Dak Lak.

Tui akŏ bruă rơwang thun 2025-2030, tơring čar amra man pơdong 5 boh sang hră kơnuk kơna čem rông ba pơlir gưl I hăng gưl II ƀơi 4 boh să giăm guai hăng 1 boh să ha guai hăng kual giăm guai dêh čar. Hơdôm boh sang hră hơmâo tuh pơ alin man pơdong ha amăng plĕ hơmâo anih pơtô hrăm, anih dŏ, sang ƀong huă, sang pơđok hră, tơdron bơrơguăt drơi jăn, anih hrăm măi komputơr, ia hơdjă hăng hơdôm ring bruă pơkŏn dong, pơhlôm brơi ƀing čơđai hrăm hră, dŏ hơdip pơƀut klă hloh.

Ơi Nguyễn Văn Hoa, Khua Jơnum min mơnuih ƀôn sang să Ia Rvê, tơring čar Dak Lak brơi thâo, sit anai lĕ tơlơi hok mơ-ak prong hăng gong gai ƀon lan laih dong mơnuih ƀôn sang kual giăm guai. Neh met wa djop djuai ania amăng să dong yua biă mă, pơhlôm djop tơlơi gal kiăng ring bruă anai tañ pơkra giong.

“Anai lĕ sa amăng hơdôm bruă yôm phăn biă mă kiăng ƀing čơđai pơtum pơƀut hrŏm ƀơi sang hră kơnuk kơna rông ba, neh met wa djop djuai ania đing nao biă mă hăng dong yua kiăng ană bă dưi hrăm hră soh”.

Ơi Trương Công Thái, kơ-iăng Khua Jơnum min mơnuih ƀôn sang tơring čar Dak Lak brơi thâo, amăng mrô 5 boh sang hră kơnuk kơna čem rông ba pơlir dua gưl kual giăm guai hơmâo man pơdong amăng tơring čar, hơmâo 4 boh sang hră hơmâo tuh pơ alin mơng ngăn drăp gơnong glông, 1 boh sang hră yua prăk djru mơng Ding jum ling tơhan hăng abih tih prăk tuh pơ alin giăm 630 klai prăk. Rĭm boh sang hră lêng pơhlôm djơ̆ tơlơi rơkâo pơtô hrăm brơi giăm 1.000-1.200 čô čơđai. Anai lĕ hơdôm ring bruă yôm phăn kơ mơnuih mơnam hăng kơđi čar, ƀu djơ̆ kơnong djru brơi bruă pơtô pơjuăt đôč ôh mơ̆ ăt pơlir hăng hơdră djru mơnuih mơnam, hơđong tơlơi hơdip mơnuih ƀôn sang, pơhlôm rơnuk rơnua-hơđong kual giăm guai. Yua anun djop gơnong bruă, sang bruă, gong gai ƀon đing nao gum hrŏm kjăp phik lơm pok pơhai pơhlôm djơ̆ tơlơi pơkă, ngă klă hăng djơ̆ hrơi blan pơkă.

“Đing nao gum hrŏm amăng bruă pơphun mơng pơhlôm brơi lŏn mơnai truh pơ hrơi anom bruă man pơdong tuh pơ alin man pơdong djop mơta, wŏt bruă krăo lăng lơm man pơdong kiăng ngă tui djơ̆ tơlơi pơkă”.

Tui yă Lê Thị Thanh Xuân, Khua gơnong bruă pơtô pơjuăt tơring čar Dak Lak, hơbô̆ bruă sang hrăm kơnuk kơna čem rông ba dua gưl ƀu djơ̆ hơdră djru brơi phara amăng kual giăm guai tơnap tap. Gơnong bruă pơtô pơjuăt hăng djop ƀon lan amăng tơring čar amra sem lăng tong ten hơbô̆ bruă anai kiăng pok prong pơ anăp dong. Gơnong bruă amra pơphô bruă brơi Jơnum min mơnuih ƀôn sang tơring čar pơjing jơlan gah pơđĭ kyar pok prong lu sang hră pơlir djop gưl, ngă gêh gal brơi ƀing čơđai dưi hrăm hră klă hloh mơng sang hră čơđai anet truh gưl II:

“Mơng hơbô̆ bruă ngă blung hlâo anai djop ƀon lan amra hơmâo akŏ bruă kiăng pok prong hơbô̆ bruă kiăng pơđĭ kyar djop gưl hră prong ƀiă kiăng ƀing čơđai gêh gal amăng bruă hrăm mơng sang hră čơđai anet truh gưl II hăng gưl III, mơng anun pơhlôm brơi ƀing čơđai amra hrăm hră klă ƀiă”.

Hơdôm boh sang hră glăk man pơdong ƀơi kual giăm guai tơring čar Dak Lak ƀu djơ̆ kơnong ba glăi tơlơi yôm kơ anih hrăm phrâo đôč ôh, hơdôm boh sang hră anai ăt djă ba tơlơi čang rơmang prong mơng gưl Ping gah, gong gai hăng mơnuih ƀôn sang amăng bruă pơtô pơjuăt amăng kual lŏn lu tơlơi tơnap tap anai. Mơng anih hrăm phrâo, hơdôm anih dŏ prong rơhaih, tơlơi pơplih phrâo glăk pok rai brơi ƀing čơđai kual giăm guai, djă ba tơlơi čang tơmang kiăng tơring čar Dak Lak pơđĭ kyar hơđong kjăp, anih tơlơi thâo thăi amra ngă bơngač brơi tơlơi hơdip kơñ pơgi mơng hơdôm kual giăm guai lŏn ia ta./.