Khua dêh čar rơkâo djop ding jum, gơnong bruă, gong gai ƀon lan ngă tui pran “tơlơi jao bruă mơng hơtai boh”, gir run pơgiong bruă jao man pơdong, pơkra ming sang dŏ, dưm dăp anih dŏ brơi mơnuih ƀôn sang hơmâo sang răm rai, sang glưh, ia kor đuăi hlâo kơ lơ 31/1/2026.

Đĭ pơhiăp pơđut mông jơnum, khua dêh čar lăng yôm tơlơi gir run mơng djop gưl, gơnong bruă, gong gai ƀon lan amăng djop mơta bruă. Kơnuk kơna ăt thâo tơlơi tơnap tap ƀơi hơdôm boh ƀon lan bơdjơ̆ nao yua hơjan ia ling dăo, lăng yôm pran gum pơgôp tơdruă mơng abih bang mơnuih ƀôn sang, pơhlôm brơi abih bang mơnuih hơmâo sang dŏ, čơkă thun phrâo tui phiăn juăt Bính Ngọ thun 2026 rơnuk rơnua, yâo mơ-ak.