Tlam lơ 22/6, ƀơi Ƀirô Kơnuk kơna, Khua dêh čar ơi Phạm Minh Chính, Khua khul git gai hơdôm jơlan hơdră tui hơnong pơkă dêh čar; Khua khul pơplông hăng pơpŭ bơni gơnong glông git gai Jơnum đơ đam dêh čar lăng glăi Jơlan hơdră tui hơnong pơkă dêh čar amăng man pơdong plơi pla phrâo, Jơlan hơdră tui hơnong pơkă pơhrŏ trun ƀun rin hơđong kjăp hăng bruă pơphun “Đơ đam dêh čar gum tơngan hrŏm man pơdong plơi pla phrâo”,  laih dong bruă “Yua kơ mơnuih ƀun rin-Anăm brơi hlơi ôh dŏ glăi gah tlôn” rơwang thun 2021-2025. Đĭ pơhiăp amăng mông jơnum, Khua dêh čar brơi thâo: Gưl tơring glông hơmâo pơgiong bruă jao yôm phun, Jơlan hơdră tui hơnong pơkă dêh čar amăng man pơdong plơi pla phrâo hơmâo tŭ yap rơbêh 50% mrô tơring glông đĭ plơi pla phrâo.

Yua anun kiăng pơpŭ bơni bruă mă mơng gưl tơring glông amăng pơđĭ kyar ngă hmua, ƀon lan hăng mơnuih ngă hmua, ngă djơ̆ bruă hăng bruă jao phun. Khua dêh čar rơkâo rơwang thun 2026-2035, pơmut jơlan hơdră tui hơnong pơkă dêh čar glăk pok pơhai sa jơlan hơdră kiăng huăi pơčut nao rai kơ tơlơi glăm ba, bruă jao. Khua dêh čar lăi pơtong jơlan hơdră hơnong pơkă dêh čar amăng man pơdong plơi pla phrâo kiăng hrưn đĭ kơ hơnong pơkă, tơlơi pơkă plơi pla phrâo gưl glông, pơhlôm prong ƀiă, lu mơnuih ƀiă, pơđĭ kyar hơdôm gơnam OCOP.