Tui anun, 231 čô mơnuih apăn bruă hơmâo Khul apăn bruă Ping gah tơring čar ruah nao mă bruă ƀơi hơdôm anih phun hơmâo: Khua git gai Ping gah, kơ-iăng Khua git gai Ping gah hăng Khua Jơnum min mơnuih ƀôn sang gưl să rơwang thun 2025-2030, pơlir hăng rơwang ngă bruă mơng gong gai 2021-2026. Sit biă ñu, hơmâo 2 čô ding kơna Ping gah tơring čar hơmâo ruah ngă khua git gai Ping gah să, phường. Anun lĕ ơi Nguyễn Xuân Phước, Ding kơna Ping gah tơring čar, Khua git gai Ping gah plơi prong An Khê hơđăp hơmâo ruah ngă Khua git gai Ping gah phường Pleiku; ơi Lưu Trung Nghĩa, Ding kơna Ping gah tơring čar, Khua gơnong bruă ngă hmua hăng ayuh hyiăng lŏn mơnai ruah ngă Khua git gai Ping gah phường An Phú. 229 čô mơnuih apăn bruă pơkŏn lĕ khua mua hơdôm boh tơring glông, plơi prong (amra pơdơi bruă) hăng sa, dua gơnong bruă amăng tơring čar.

Amăng mông jơnum, Ping gah tơring čar Gia Lai pơsit tong: gưl să phrâo lĕ phun ngă tui tơlơi črâo trun, hơdră bruă mơng Ping gah hăng Kơnuk kơna, pơsir giăm 80% bruă ngă hră pơ-ar amăng ƀon lan. Yua anun, bruă mă, pran jua glăm ba mơng ƀing apăn bruă phun lĕ ba truh tơlơi truh kih.