Amăng dua hrơi rơgao, ƀơi lu kual mơ̆ng tơring čar Kon Tum hơmâo hơjan anet truh kơ jơlan prong hơđuh đua. Tơring čar Kon Tum kiăng gong gai hơdôm boh tơring glông, plơi prong hrŏm hăng hơdôm anom bruă bơdjơ̆ nao wai lăng kjăp ayuh hyiăng, dŏ gak, krăp lăng, hyu pel ĕp sem lăng, pơplih hơdră pơgang. Iâu pơthưr mơnuih apăn bruă, rơdêh, măi mok pơgang tơlơi truh, pơsir hmao kru, tŭ yua tơdah hơmâo tơlơi truh sat. Lăng glăi rơđah djŏp kual plơi pla, ring bruă yôm phun, tañ ƀuh pơpă ƀu rơnuk rơnua, amuñ hơmâo tơlơi truh, jao bruă kơ ling tơhan mơnuih apăn bruă, rơdêh măi mok, ba pơđuăi mơnuih ƀôn sang mơ̆ng anih hŭi rơhyưt pơhlôm ba tơlơi hơdip, plai ƀiă răm rai gơnam tam mơ̆ng Kơnuk kơna hăng mơnuih ƀôn sang.

Jơnum min mơnuih ƀôn sang tơring čar Gia Lai hơmâo hră mơ-it hmar ječ ameč kơ bruă git gai bong glăi hơjan hlim hŭi ia ling dăo prong, lŏn tơhlŏm. Tơring čar pơtrun hiăp brơi ƀing tơhan kơsung nao, hyu ĕp lăng, djop plơi pla mơnuih ƀôn sangdŏ ter hang ia krông, ia ania, ia čroh hnoh, kual juăt hơmâo ia ling dăo kiăng prăp lui pơdŭ đuăi mơnuih ƀôn sang hăng kông ngăn nao pơ anih dŏ rơnuk rơnua hloh. Brơi ƀing tơhan dŏ gak, wai lăng, bong glăi amăng anih či hơmâo tơlơi truh; hlă gai hla bơnal pơthâo brơi mơnuih ƀôn sang kơđiăng sit găn nao rai ƀơi tơdrông ia blai đĭ, kiăng rô nao rai rơnuk rơnua hăng huăi kơđông. Prăp lui pok pơhai lu hơdră ngă hmua djơ̆ găl; pơgang anih anom tuh tia pơkra ming gơnam sĭ mơdrô sa ƀut hŭi bơbeč yua. Djop dơnao ia, bơnư̆ pơkong, sang măi drai apui lơtrik anet prong brơi pơpha mơnuih mă bruă dŏ ĕp lăng na nao, ĕp lăng jơlah ia đĭ blai amăng dơnao; ngă tui bruă kah pơpha pok pơhai ia lăp djơ̆ pơgang hơđong ring bruă bơnư̆ pơkong hăng ia rô trun pơ kual gah tơkai ăt hơđong.