Rơwang hrơi kom hlâo, Gơnong bruă Boh thâo hăng ia rơgơi tơring čar Dak Lak ngă hrŏm Gơnong bruă Boh thâo hăng ia rơgơi tơring čar Phú Yên laih anun sang bruă dăng kông dua boh tơring čar pơphun anih pơtô hrăm bruă mă yua glông boh thâo ia rơgơi mrô kơ dua boh tơring čar pơmut jing sa, brơi ƀing khua mua, mơnuih apăn bruă thâo, truh pơ gưl să amăng Dak Lak hăng Phú Yên. Jơlan hơdră dưm dăp glăi boh thâo ia rơgơi glông tơlơi pơhing plang internet amăng bruă pơčrâo ba 2 hlông anăn pơtruh tơlơi pơhing: Glông tơlơi pơhing pơsir hră pơar mơ̆ng kơnuk kơna ƀơi Dak Lak hăng anŏ git gai pơsit hră pơar.

Ơi Nguyễn Văn Thản, Kơ-iăng khua sang bruă dăng kông Dak Lak, anih dưi hơmâo Jơnum min mơnuih ƀôn sang tơring čar Dak Lak jao, pok pơhai ba yua boh thâo ia rơgơi tơlơi pơhing hmar bơwih brơi bruă pơmut dua boh tơring čar Dak Lak hăng Phú Yên, brơi thâo, rơbêh 1000 anih pơkĕ măi komputer ƀơi 102 boh să, phường hăng hơdôm rơbâo čô mơnuih apăn bruă kơnuk kơna mơ̆ng dua boh tơring čar hrăm mă yua boh thâo ia rơgơi mrô. Anai yơh ƀing ngă bruă phun tŭ mă hăng pơsir hră pơar mơnuih ƀôn sang ƀơi Dak Lak phrâo.

“Hơdôm khul mơnuih apăn bruă mơ̆ng 5-7 čô dŏ mă bruă amăng sa anih dưi mut hrăm hrŏm hơbit. Laih dơ̆ng pơhun mơtam ƀơi mông hrăm ƀơi anih jơnum prong să phrâo akŏ pơdong, ngă gêh găl brơi kơ lu mơnuih apăn bruă mut hrăm, ĕp lăng. Ƀing gơmơi đing nao djă tơngan pơčrâo bruă ƀơi anăp mơta, pơtô brơi ba yua boh thâo ia rơgơi mrô amuñ hloh kơ ƀing khua mua thâo hla tui, tơdah hơmâo tơlơi hơgĕt amăng bruă mă rim hrơi kiăng gơñu thâo pơsir tañ huăi sư̆ rơbư̆ hĭ ôh lơ̆m tŭ mă hră pơar mơnuih ƀôn sang”.

Hlâo kơ anun, Ping gah tơring čar Dak Lak hơmâo pôr pơthâo laih anăn khua mua phun amăng să, phường phrâo. Tơring čar ăt akŏ pơjing 6 grup hyu mă bruă, pơtô brơi ƀing khua mua apăn bruă hăng krăo lăng pơčrâo prăp lui jơnum ruah khua ping gah djop gưl rơwang bruă thun 2025-2030 ƀơi djop sang bruă phrâo.

Ƀơi mông jơnum lăi pơthâo bruă mă djop gưl anom bruă ping gah, gong gai kơnuk kơna hăng khuk anom bruă mơnuih tơpuôl kơđi čar-mơnuih mơnam, ơi Nguyễn Tuấn Hà, Kơ-iăng khua Jơnum min mơnuih ƀôn sang tơring čar Dak Lak pơtă pơtăn:

“Ƀing gih hơmâo ngă khua git gai jơnum mơnuih ƀôn sang djop tơring glông laih thâo laih mơ̆n amăng bruă mă, mơ̆ng anun ĕp tơlơi hrăm kơ ta amăng bruă ngă anun, samơ̆ ƀu ngă tui 100% bruă mă kơ să phrâo ôh, ñu phara hăng hlâo, pơpha bruă mă, huăi pleh ploh lu lơi, ră anai rơbêh 1 rơbâo mơta bruă mă khom pơblih amăng tơlơi pơmin. Ƀing gih mă bruă ƀơi gưl tơring čar hăng ngă khua jơnum min să khom đing nao, ƀu ngă mưng ôh, yua dah dŏ lu tơlơi tơnap tap amăng bruă ƀing ta pơsit hăng glăm ba amăng bruă mă”.

Tui hăng akŏ bruă, amăng dua hrơi lơ 25 hăng lơ 26/6, djop sang bruă gưl să, phường ƀơi Dak Lak pơphun tơgŭ mă bruă sa amăng plĕ lông ngă hlâo. Hlâo kơ anun, djop să hơmâo prăp lui laih gơnam yua mă bruă, ngă giong pơkĕ dăng kông pơtruh nao rai tơlơi pơhing mă bruă hăng điện tử laih anun pơphun tŭ mă hră pơar mơnuih ƀôn sang hăng pơsir hră ƀom kiơng, jăm tơlơi soh.

Ơi Nguyễn Đình Trung, Khua git gai ping gah tơring čar Dak Lak, lăi pơtong: tal pơphun lông  ngă hlâo mă bruă anai kiăng pơtong glăi tơlơi thâo amăng djop sang bruă, git gai hăng pơsir bruă mă tui tơlơi hơmâo sit nik mơ̆ng ƀing apăn bruă kơnuk kơna sang bruă phrâo. Mơ̆ng anun, kiăng hmao kru tañ ƀuh hơdôm tơlơi tơnap tap, gun gan kiăng pơsir tañ ƀơi anăp mơta hlong tơgŭ mă bruă truh tơdơi anai.

“Ƀing ta lăi lĕ, lông ngă lăng, samơ̆ boh tŭ yua kiăng pok pơhai sit nik amăng bruă mă. Anai lĕ yak rơbat hlâo prăp lui lơ 1/7 ƀing ta hlong mă bruă sit nik kiăng huăi sư̆ rơbư̆, laih anun ƀu hơmâo hlơi dŏ tơguan pô hlơi ôh, tơdah ƀing khua mua phun, git gai ƀu pok pơhai ngă tui kơ khua mua apăn bruă gah yŭ ngă, dŏ tơguan bruă tui anun sit mơ̆n bruă mă či kơđông mơtam. Yua kơ anun, ƀing gih khom tui hluai bruă jao ngă, khom pơphun git gai pơčrâo bruă ta lông ngă lăng anun, laih anun khua git gai ping gah să phường phrâo amra gơgrong ba bruă ngă anai, hrŏm hăng abih bang glông bruă kơđi čar kual pơyŭ anun”.

­