Amăng hơdôm hrơi nao Jơnum tui tơđar rĭm thun ƀing mơnuih ba jơlan hlâo tal 16 mơng Khul bơwih ƀong jar kmar (WEF) pơphun ƀơi Thiên Tân hăng mă bruă ƀơi dêh čar Khač, tlam lơ 24/6 ƀơi Thiên Tân, Khač, Khua dêh čar ơi Phạm Minh Chính jơnum bơkơtuai hăng dêh čar Khač ơi Lý Cường. Amăng mông jơnum bơkơtuai, Khua dêh čar pơsit tong, Việt Nam lêng kơ lăng bruă pơđĭ kyar tơlơi rô nao rai hăng Khač lĕ tơlơi rơkâo phun, jing tơlơi ruah kiăng ngă tui, hơdră bruă yôm phăn hăng anai lĕ tơlơi đing nao prong hloh amăng hơdră pơtom hiăp; đăo gơnong dêh čar Khač amra tŏ tui pơđĭ kyar, tŏ tui tơlơi gơgrong phun amăng hơdôm bruă pơđĭ kyar, pơgang rơnuk rơnua hăng hiam klă amăng rŏng lŏn tơnah.

Dua čô khua dêh čar pơčrông dơlăm, tơpă sit hơdôm bruă amăng kual ia rơsĭ, sit biă ñu gum hrŏm wai lăng pơgang hăng pơsir hĭ klă hơdôm bruă pơmĭn phara, pơhlôm rơnuk rơnua, hơđong. Khua dêh čar ơi Phạm Minh Chính rơkâo dua bơnah ngă tui khut khăt tui tơlơi pơmĭn hrŏm mơng khua mua, “Tơlơi pơkôl kơ hơdôm tơlơi pơkă phun amăng git gai pơsir hĭ bruă amăng kual ia rơsĭ Việt Nam-Khač”; hrŏm hăng kual ASEAN gir run tañ hơmâo tơlơi pơkôl COC kiăng dưi ngă tui klă, sit nik, lăp djơ̆ hăng tơlơi phiăn jar kmar hăng UNCLOS 1982 tui tơlơi bơtŭ ư hrŏm mơng djop bơnah.