Bruă akŏ pơjing 5 grup mă bruă pơdah pran gir run pơplih hơdră git gai mơng tơring čar Dak Lak tui jơlan gah jê̆ giăm, ba mơnuih apăn akŏ nao tơl anih kiăng git gai pơsir hĭ tơnap tap. Ơi Lương Nguyễn Minh Triết, Khua git gai Ping gah tơring čar Dak Lak brơi thâo, bruă pơhrui glăi lŏn mơnai lĕ bruă akŏ phun, pơsit brơi kơ bruă pok pơhai ngă hơdôm akŏ bruă phun hăng bruă ngă tui hơnong pơkă pơđĭ kyar bơwih ƀong huă đĭ dua mrô amăng tơring čar.

Tơlơi sit nik anai brơi ƀuh, akŏ bruă hơpă kaih pơhrui glăi lŏn mơnai, akŏ bruă anai amra kaih pok pơhai, ngăn rơnoh tuh pơ alin amra đôm glăi, tơlơi dưi pơđĭ kyar rơgao hĭ. Tui Khua git gai Ping gah tơring čar Dak Lak, tơring čar ră anai hơmâo 265 akŏ bruă glăk bưp tơnap tap amăng pơhrui glăi lŏn mơnai. Bruă akŏ pơjing 5 grup mă bruă tal anai kiăng đing nao pơsir hĭ tơlơi gun ha amăng plĕ ƀơi 102 boh să, phương amăng đơ đam tơring čar.