Tui hăng tơlơi lăi pơthâo mơng Jơnum min mơnuih ƀon sang tơring glông M’Drăk, ring bruă dơnao kŏng ia Krông Pač gah hlâo  pơgăn glông ia rô, kŏng ia amăng rơnuč blan 3/2023. Samơ̆, truh ră anai kơnong hơmâo năng ai ñu 450 boh sang anŏ amăng mrô rơbêh 700 boh sang anŏ dŏ amăng kual dơnao ia đuăi nao pơ anih dŏ phrâo mrô 1 hăng mrô 2 ƀơi tơring glông Ea Kar. Amăng mrô 250 boh sang anŏ aka ƀu nao dŏ, hơmâo 28 boh sang anŏ dŏ gah yŭ mrô pơkă 483m mơng dơnao kŏng ia, amuñ bưp tơlơi truh tơdah hơmâo hơjan hlim, ia dăo, amuñ hơmâo ia amăng dơnao blai đĭ, ngă dăo abih mơtăm.

Hơdôm boh sang anŏ anai djơ̆ biă ñu khŏm hơmâo ba đuăi hlâo kơ lơ 30/3/2023 laih, amăng tal 1, črăn 2 mơng bruă pơgô̆, mă glăi lŏn hăng hơdôm boh sang anŏ ƀu ngă tui tơlơi pơtrun mă glăi lŏn pioh pơkra dơnao ia. Hrŏm hăng bruă pơgô̆ 28 boh sang anŏ dŏ gah yŭ mrô pơkă 483m, Jơnum min mơnuih ƀon sang tơring glông M’Drăk amra gir iâu pơthưr, pơtô pơblang kiăng ba pơđuăi abih hơdôm boh sang dŏ glăi amăng dơnao ia.