Hăng anăn “Dak Lak - Tơlơi dưi, pran hrưn đĭ pơđĭ kyar”, Jơnum lăi pơthâo bruă dưm dăp hăng pơsur tuh pơ alin thun 2026 pơhưč giăm 1.000 čô mơnuih hrŏm anai lĕ ƀing khua mua djop Ding jum, gơnong bruă, khul grup jar kmar, khul pơlir bơwih ƀong sĭ mơdrô, grup bơwih ƀong jar kmar hăng anom tuh pơ alin amăng lŏn ia, tač rơngiao.

Tơlơi kơđŏm glăi yôm hloh mơng jơnum anai lĕ bruă lăi pơthâo tơlơi pơtrun tŭ yap bruă pơplih dưm dăp tơring čar Dak Lak rơwang thun 2021-2030, anăp nao truh thun 2050. Bruă dưm dăp phrâo čang rơmang amra pok rai anih pơđĭ kyar pok prong ƀiă, pơjing rai hơdôm kual pơtrut pơsur, glông ter bơwih ƀong huă hăng hơdôm anom bruă pơđĭ kyar phrâo, ngă atur phun kiăng ƀon lan pơhưč hơdôm ngăn rơnoh tuh pơ alin amăng rơwang phrâo.

Hrŏm hăng bruă mă phun, Jơnum anai ăt pơphun hơdôm bruă anun lĕ: Pok man pơdong, ngă lơphet pok mă yua sa, dua ring bruă, akŏ bruă ba gru; Jơnum pơlăi nao rai hăng anom bơwih ƀong sĭ mơdrô, anom bơwih ƀong hrŏm hăng hơdôm boh sang anŏ bơwih ƀong sĭ mơdrô; Jơnum bơwih ƀong mơnuih ƀôn sang ngă pô Việt Nam-Jơnum pơlăi nao rai plơi pla ƀơi Dak Lak; jơnum pơčrông sai bruă pơđĭ kyar tuh tia pơkra ming klă hăng logistics pơlir kual; jơnum pơčrông sai kơ “Pơđĭ kyar ngă hmua yua boh thâo phrâo: Tơlơi dưi hăng hơdră bruă brơi anom bơwih ƀong sĭ mơdrô”; Jơnum kơ “Pơplih mrô hăng pơđĭ kyar glông pơlir bơwih ƀong sĭ mơdrô hơđong kjăp”, Jơnum sang čơ gơnam đang hmua ƀon lan ba gru, gơnam OCOP mơng tơring čar hăng hơdôm boh tơring čar ieo gah…

Amăng mông jơnum, tơring čar Dak Lak jao tơlơi pơtrun ngă tui tơlơi črâo trun tuh pơ alin, hră pơsit čih anăn tuh pơ alin hăng kĭ pơkôl hơdôm pok hră pioh hơdor ngă hrŏm brơi hơdôm hơpluh akŏ bruă amăng djop mơta bruă. Ơi Trần Công Sơn, Kơ-iăng Khua gơnang bruă prăk kak tơring čar Dak Lak brơi thâo, hrŏm hăng bruă pơhưč tuh pơ alin sit nik, tơring čar glăk pok pơhai tơhnal pơkă “glông mơtah” kiăng tañ ƀiă hrơi mông ngă hră pơ-ar brơi hơdôm anom bơwih ƀong sĭ mơdrô. “Gơnong bruă prăk kak hơmâo pơphô bruă brơi Jơnum min mơnuih ƀon sang tơring čar pơjing tơhnal pơkă glông mơtah tui jơlan gah pơhrŏ 50% mrô hră pơ-ar kiăng ngă, hăng gưl pơsit bruă tuh pơ alin hlâo anun lĕ 17 hrơi, ră anai dŏ giăm 8,5 hrơi. Ră anai tơhnal pơkă “glông mơtah” hơmâo tơring čar lăi pơthâo, pơ anăp anai hluai tui bruă pơtum pơƀut glăi hơdôm gơnong bruă bơdjơ̆ nao pơphô bruă brơi Jơnum min mơnuih ƀon sang tơring čar ba tơbiă hơdră ngă hră pơ-ar brơi tañ ƀiă bơdjơ̆ nao hơdôm pok hră pơ-ar akŏ bruă tuh pơ alin kiăng pơhlôm brơi hơdôm akŏ bruă anai tañ ngă hăng ba glăi boh tŭ yua”.

Ƀu djơ̆ kơnong đing nao pơsir hĭ hơdôm tơlơi gun kơ ngă hră pơ-ar, tơring čar Dak Lak ăt glăk prap lui ha amăng plĕ hơdôm tơlơi gal kơ anih anom, mơnuih mă bruă hăng pơplih mrô kiăng čơkă hơdôm akŏ bruă phrâo. Tui khul pơphun, hăng hơdôm hơpluh akŏ bruă hơmâo jao pơsit tuh pơ alin hăng kĭ pơkôl ngă hrŏm, anai arăng lăng lĕ sa amăng hơdôm bruă pơsur tuh pơ alin pơprong hloh mơng hlâo truh ră anai amăng ƀon lan.

Amăng hrơi blan anih pơđĭ kyar glăk pok rai lu tơlơi dưi pơlir hơbit kơplah wah kual Dap kơdư hăng ter hang ia rơsĭ Dơnung tong krah, jơnum tal anai čang rơmang ƀu djơ̆ kơnong pơhưč dong ngăn rơnoh brơi pơđĭ kyar bơwih ƀong huă-mơnuih mơnam đôč ôh mơ̆ ăt  ngă pơplih tơlơi pơmĭn pơhưč tuh pơ alin, mơng kiăo tui mrô jŭ yap lu hơdai nao bruă ruah hơdôm akŏ bruă klă hloh, dưi ba glăi tơlơi pơtrut pơđĭ kyar sui thun brơi ƀon lan. Ơi Trương Công Thái, kơ-iăng Khua Jơnum min mơnuih ƀon sang tơring čar Dak Lak pơsit tong: “Jơnum lăi pơthâo bruă dưm dăp man pơdong tơring čar hăng pơsur tuh pơ alin thun 2026 amăng tơring čar Dak Lak, hăng hơdôm akŏ bruă hăng abih tih prăk tuh pơ alin mơ̆ hơdôm anom bơwih ƀong sĭ mơdrô hơmâo kĭ pơkôl, arăng lăng anai lĕ sa amăng hơdôm bruă pơhưč, jak iâu tuh pơ alin prong hloh dong mơng hlâo anun, tơdơi kơ pơmut hrŏm tơring čar Dak Lak hăng Phú Yên. Hăng ngăn rơnoh tui anun, gah tơring čar đing nao pok pơhai bruă ngă hră pơ-ar, pơplih mrô; dua dong lĕ pơtô pơjuăt mơnuih mă bruă rơgơi kiăng djru brơi hơdôm akŏ bruă pơ anăp dong; tal tlâo lĕ hăng bruă pơsir ngă hră pơ-ar, mơng blung a lơm anom bruă tuh pơ alin mut nao mă bruă, ƀing gơmơi amra nao bưp hăng pơsir hĭ hơdôm bruă tơnap tap”./.