Tal pơplông mă ƀăng gưl 3 thun 2023 pơkă hlâo pơphun mơng lơ 27 truh lơ 29/6/2023. Thun anai, tơring čar Dak Lak hmâo rơbêh kơ 21.100 čô čơđai rơkâo pơplông, amăng anun hmâo rơbêh kơ 610 čô čơđai rơkâo pơplông mơng gah rơngiao. Tơring čar Dak Lak pơpha dong 32 bôh anih anom sit nik hăng 886 bôh anih pơplông amăng 15 bôh tơring glông, plơi prong.

Amăng mông jơnum pok pơhai bruă prăp lui pơphun Tal pơplông thun 2023, tom brơi (22/5), Grŭp Črâo ba bruă pơplông mă ƀăng gưl 3 tơring čar Dak Lak črâo ba hơdôm gơnong bruă, anom bruă hăng tơring glông, plơi prong khom prăp lui tŏng ten kơ tal pơplông mă ƀăng gưl 3, biă ñu pơhlôm ƀing čơđai ƀơi kual asuek, ataih dưi lăi pơthâo djop tơlơi pơhing kơ tal pơplông. Pơhiăp amăng mông Jơnum, yă H’ Yim Kơđoh – Kơ-iăng Khua Jơnum min mơnuih ƀôn sang tơring čar Dak Lak, Khua Grŭp črâo ba bruă pơplông gưl tơring čar rơkâo, hơdôm gưl, hơdôm gơnong bruă, tơring glông, plơi prong khom kơtưn bruă gum hrom, gơgrong hlâo ba tơbiă jơlan gah ngă tui rơđah, sit nik, pơhlôm tal pơplông pơphun pơhlôm, ba glăi bôh tơhnal, tơpă, djơ̆ phiăn pơkă./.