Tom brơi (18/6), Khul git gai ngă tui hơnong pơkă pơđĭ kyar bơwih ƀong huă dua mrô tơring čar Dak Lak rơwang thun 2026-2030 pơphun jơnum tal 3 kiăng lăng glăi boh than pơđĭ kyar bơwih ƀong huă-mơnuih mơnam 6 blan akŏ thun hăng ba tơbiă hơdôm hơdră pơtrut pơđĭ kyar pơ anăp dong. Kiăng pơgiong hơnong pơkă pơđĭ kyar mơng 10% pơ glông amăng thun 2026, pơđĭ kyar bơwih ƀong huă hrŏm 6 blan rơnuč thun amăng tơring čar Dak Lak kiăng mơng 11,8% truh 12%.

Tui ơi Lương Nguyễn Minh Triết, Khua git gai Ping gah tơring čar Dak Lak, ƀing ding kơna khul git gai, Jơnum min mơnuih ƀon sang tơring čar hơmâo lu tơlơi gir run amăng bruă kiăo tui hơdôm hơnong pơkă pơđĭ kyar, pơsir hĭ tơnap tap brơi hơdôm akŏ bruă hăng anom bơwih ƀong sĭ mơdrô. Laih dong, rơkâo djop gơnong bruă, sang bruă, ƀon lan tŏ tui đing nao pơsir hĭ hơdôm akŏ bruă dŏ đôm glăi, pơtrut kơtang bruă juă nua mă yua lŏn mơnai, khut khăt jao prăk tuh pơ alin man pơdong hăng pơgiong hră pơ-ar kiăng hơdôm akŏ bruă phrâo tañ pok pơhai, ngă pơtrut pơđĭ kyar brơi hơdôm blan rơnuč thun.