Ngă tui Hră pơtrun mrô 57, thun anai tơring čar Dak Lăk prăp lui rơbêh 1.000 klai prăk kơ boh thâo măi mok hăng pơčeh phrâo ia rơgơi, laih dong him lăng hơmâo lu tui dong amăng hơdôm thun pơ anăp. Khă hnun, truh ră anai, tơring čar kơnong kơ brơi nao năng ai 30 klai đôč, mrô anai hai aka ƀu mă yua abih lơi.

Ơi Cao Đình Huy, Khua gơnong bruă prăk, brơi thâo Dak Lăk ƀu kơƀah ôh prăk kơ boh thâo ia rơgơi, măi mok, tơlơi pơčeh phrâo. Hăng hơdră djru glăk hơmâo, sang bruă bơwih ƀong anet hăng man ƀrô dưi djru truh kơ 100 klăk prăk rim thun. Hơdôm bruă kơsem min boh thâo hơmâo brơi nao prăk djru mơ̆ng 50% truh kơ 100% prăk apah mơnuih pơkra măi, gơnam pơkra hăng măi mok. Khă hnun, kiăng hơmâo čih pơkra kơčăo bruă, hơmâo tơlơi rơkâo rơđah rơđông đah mơ̆ng pơphun ngă.

Gah sang bruă mơdrô, ơi Phạm Ngọc Duy Liêm lăi, anih sĭ mơdrô ră anai ƀu kơƀah ôh phần mềm ƀudah hơdră pơkra boh thâo măi mok. Khă hnun, sang bruă mơdrô khŏm pơsit anŏ hơget gơñu kiăng, bruă hơget dưi pơsir hĭ hăng boh thâo măi mok, mơ̆ng anun ba tơbiă tơlơi či kiăng rơđah rơđông hăng sang bruă mơdrô boh thâo măi mok: “Hơdôm sang bruă mơdrô gah boh thâo măi mok gơmơi glăk kơƀah lĕ anŏ kiăng mơ̆ng sang bruă mơdrô, jing ƀing ta khŏm pơčrông nao rai, ƀu kơnong sang bruă mơdrô măi mok đôč ôh ba pơdah anŏ yom, anŏ klă mơ̆ng măi mok, ăt kiăng sang bruă bơwih ƀong mơdrô ba tơbiă anŏ hơget gơñu kiăng, glăk hơmâo tơlơi tơnap hiưm pă kiăng sang bruă mơdrô măi mok pơkra brơi”.

Ƀing khua hơmâo tơlơi rơkâo, hăng tơlơi gêh găl ngă hmua, pơkra gơnam laih anun čơkă tuai hyu ngui, Dak Lăk dưi ngă hlâo pơsir hĭ anŏ tơnap, kah hăng ngă hmua rơgơi, ngă hră ĕp ƀuh anih pla, wai lăng bruă tơjŭ pla, pơkra gơnam hăng thâo rơgơi čơkă tuai; akŏ pơjing anih sem lăng boh thâo măi mok yom, anih sang bruă mơdrô ba pơƀuh anŏ tơnap, kiăng hơdôm anom bruă măi mok sem lăng pơsir brơi amăng 3 truh kơ 6 blan; tơdah dưi pơsir tŭ yua lĕ ta ngă prong tui.

Ơi Đỗ Hữu Huy, Khua jơnum min mơnuih ƀôn sang tơring čar Dak Lăk pơsit, lu sang bruă bơwih ƀong ƀơi tơring lĕ sang bruă bơwih ƀong anet hăng anet aneo đôč. Lơ̆m mă yua măi mok ia rơgơi phrâo, anŏ tơnap prong hloh lĕ păk kăk, mơnuih mă bruă rơgơi hăng tơlơi pơmin alah či pơplih. Yua hnun, kiăng pơklaih brơi anŏ gun anai, tơring čar pơtrut pơsur sang bruă bơwih ƀong tuh pơ alin blơi măi mok hơmâo hră mă yua, laih dong pơtruh nao rai plah wah sang bruă bơwih ƀong hăng gong gai, sang hră gưl prong, sang bruă kơsem min boh thâo hăng ƀing kơhnâo boh thâo ia rơgơi: “Hơdôm sang bruă bơwih ƀong kiăng pơplih tơlơi pơmin, kơ bruă wai lăng, kiăng thâo pơplih, pơčeh phrâo amăng sang bruă. Dua lĕ kiăng pơƀut ngă bruă gêh găl, hmư̆ hing hloh amăng tơring čar, lăng nao hơbô̆ bruă pơtruh “klâo boh sang”, gơnong bruă, sang bruă bơwih ƀong kiăng rơkâo blơi gơnam pơ hơdôm boh sang hră ƀơi tơring čar, hơdôm sang bruă kơsem min boh thâo, hăng ƀing kơhnâo boh thâo ia rơgơi amăng tơring hăng tơring čar pơkŏn, sang bruă bơwih ƀong kiăng anŏ hơget, či blơi măi hơget, pơthâo brơi sang bruă kơsem min, gơnong bruă, ƀudah hơdôm boh sang hră ĕp jơlan pơkra brơi anŏ či kiăng”./.