Mơguah lơ 30/12, ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar Dak Lak, hơmâo kĭ hră mrô 12306, mơ-it kơ Gơnong bruă Ngă hmua hăng pơđĭ kyar plơi pla, Gơnong bruă Tuh tia pơkra ming hăng sĭ mơdrô, Gơnong bruă Ia jrao, Kông an tơring čar hăng Jơnum min mơnuih ƀôn sang plơi prong Ƀuôn Ma Thuôt, brơi pơtong rơđah tơlơi hơmâo, bruă arăng ngă tram ia jrao sat amăng rơtă kiăng čăt tañ ƀơi Dak Lak, pơdjơ̆ nao tơlơi pơhing mơ̆ng VOV hăng akŏ tơlơi čih “Rơtă čăt tram amăng ia jrao arăng kom ƀơi Dak Lak: Anom bruă kơnuk kơna bơjang nao rai tơlơi gơgrong ba”.

Tui hăng anun, Jơnum min mơnuih ƀôn sang tơring čar Dak Lak pơtrun hiăp kơ Gơnong bruă Ngă hmua hăng pơđĭ kyar plơi pla pơphun jơnum hăng gơnong bruă tuh tia pơkra ming hăng sĭ mơdrô, gơnong bruă ia jrao, kông an tơring čar laih anun Jơnum min mơnuih ƀôn sang plơi prong Ƀuôn Ma Thuôt laih anun hơdôm sang bruă pơdjơ̆ nao brơi lăi pơthâo amăng bruă git gai wai lăng anŏ hơdjă mơnong ƀong huă sĭ mơdrô, anih pơkra ming hăng 6 boh sang pơkra rơtă čăt mă yua ia jrao arăng kom, bruă mă hơduah ĕp tơlơi soh, tơgŭ kơđi, ĕp phun tơdŭ mơ̆ng hơmâo gơnam anun hăng boh tơhnal bruă ngă truh mông anai. Jơnum min mơnuih ƀôn sang tơring čar Dak Lak pơtrun hiăp djop sang bruă kơnuk kơna lăi pơthâo rơđah rơđong hră pơsit anom bruă djop anŏ gêh găl mă bruă pơkra ming anŏ hơdjă mơnong ƀong huă, sĭ mơdrô rơtă čăt amăng tơring čar, laih dơ̆ng, pơdah thâo hơdră pơsir wai lăng djop sang bruă pơkra ming, sĭ mơdrô rơtă čăt kơñ pơgi anai.