Rơbat hyu ĕp lăng ƀơi lu anih sĭ mơdrô, amăng sang sĭ mơdrô prong siêu thị laih anun sang čơ plơi prong Ƀuôn Ma Thuôt, tơring čar Dak Lak ƀuh ba mơtam tơlơi mơak čơkă têt thun phrâo kơdok kơdor. Ƀing sĭ mơdrô amăng sang čơ hăng pơ siêu thị pơhrôp hiăm, pơdă gơnam sĭ mơdrô pioh bơwih brơi kơ bruă čơkă têt. Hlăk dŏ ruah mă gơnam sĭ mơdrô pioh blơi prăp kơ hrơi têt ƀơi sang sĭ mơdrô či akiăng jơlan Nguyễn Văn Cừ, amai Trần Thảo Nguyên dŏ ƀơi phường Tân Lập, kah pơpha:

“Gơnam têt thun anai lu mơta biă mă, rơnoh ăt rơgêh mơ̆n. Têt blơi pơhrua dơ̆ng ƀañ kĕo, ƀiă gơnam yua pơkŏn, tơpai, ƀiêr, ia mih hăng mơnong ƀong huă pioh ba glăi na nao rim thun hnun soh, pơyơr kơ amĭ ama, brơi gơnam têt kơ  ơi yă, ƀing neh met wa. Sang anŏ gơmơi ăt blơi prăp hrup hăng tơđar thun đôč, ƀu blơi pơđôm lui lu ôh, yua ră anai, blơi gơnam ƀong huă dŏ asăt na nao soh”.

Ƀơi sang čơ Tân An, sa amăng hơdôm sang sĭ mơdrô prong amăng plơi prong Ƀuôn Ma Thuôt, lu mơnuih ngă bruă sĭ mơdrô hơmâo ba pơdă gơnam sĭ mơdrô bơwih brơi gơnam ƀong têt čơkă thun phrâo tañ hloh tơđar thun. Amai Đồng Thị Thanh Trúc, mơnuih sĭ mơdrô bañ kĕo brơi thâo, thun anai ñu blơi pơmut gơnam sĭ mơdrô đĭ tui 30% amăng pơkă hăng thun hlâo hăng ba sĭ mơdrô mơ̆ng akŏ blan 12 thun laih rơgao.

Ƀơi hơdôm siêu thị hăng anih sĭ mơdrô pơprong, gơnam sĭ mơdrô bơwih brơi têt ăt prăp lui tañ mơ̆n. Kơnang kơ bruă pơblang tong ten anih anom sĭ mơdrô hăng tơlơi bơwih ƀong huă amăng thun 2024, djop sang bruă hơmâo kơtưn ba pơmut gơnam sĭ mơdrô mơ̆ng 30-50% pơkă hăng thun hlâo. Ayong Lê Xuân Hoan, pô wai lăng hơdôm sang sĭ mơdrô pơprong amăng đơ đam tơring čar Dak Lak, brơi thâo: anom bruă gơñu prăp lui gơnam sĭ mơdrô đĭ tui 50% pơkă hăng têt thun Giáp Thìn. Hrŏm hăng anun, prăp lui gơnam lu hăng pơsur sĭ mơdrô rơgêh, thun anai, lu sang sĭ mơdrô riah daih đing nao biă mă kơ bruă pơhlôm gơnam sĭ mơdrô hiam klă, biă mă ñu tơdơi kơ ƀuh arăng sĭ mơdrô rơtă čăo tram amăng ia jrao arăng ĕp ƀuh mơ̆ng sang sĭ mơdrô pô ba hyu phun hăng ƀơi lu sang bruă sĭ mơdrô pơkŏn.

“Djop mơta gơnam sĭ mơdrô hơmâo pơhlôm djop hơdră wai pơgang mơnong ƀong huă hơdjă rơgoh. Gơnam sĭ mơdrô prăp lui lu samơ̆ ƀu pơgiăng nao pơtum lu đơi ôh amăng sa ƀut anih gơnam sĭ mơdrô, amăng hơjai djă lui amăng anih tuh tia pơkra ming sa ƀut Tân An, sĭ abih kah pơgiăng nao dơ̆ng”.

Kiăng pơtrut blơi gơnam amăng bơyan Têt, djop anih sĭ mơdrô, siêu thị pok pơhai lu hơdră pơsur blơi gơnam rơgêh, pơtrun nua. Hrŏm hăng anun, djop siêu thị ăt pơhrua nao mơnuih mă bruă hăng pok prong bruă bơwih brơi kơ djop sang sĭ mơdrô pok bah amăng sĭ tañ hăng krư̆ bah amăng kaih hloh pơkă hăng tơđar hrơi amăng dua wơ̆t hrơi tơjuh hlâo kơ truh Tế. Tui hăng yă Trần Thị Thành Nhân, Kơiăng Khua  sang bruă siêu thị Co.opmart Buôn Ma Thuôt, gơnam sĭ mơdrô pioh sĭ bơyan Têt amăng siêu thị lu mơ̆ng 30-50%, amăng anun gơnam Việt Nam pơkra ming truh 90%. Siêu thị ngă tui hơdră pơsur blơi, trun nua hơdôm rơbâo mơta gơnam sĭ mơdrô mơ̆ng lơ 1/12/2024 truh abih lơ 28/1/2025.

Anom bruă hơmâo răk pioh gơnam amăng 2 blan sĭ mơdrô Têt rơbêh 80 klai prăk, amăng anun gơnam sĭ mơdrô ngă pơhơđong nua rơbêh 20% laih anun anom bruă pơtum nao amăng hơdôm mơta gơnam kah hăng mơnong ƀong huă, gơnam pơkra ming, añăm mơnong mơnŭ bip, un bui hăng añăm hla rơ̆k asăt hơbơi, boh troh laih anun djop mơta gơnam pioh yua amăng hrơi ƀong têt hăng rơnoh lăp djơ̆ ƀu hơmâo đĭ trun rơgao ôh, hlâo amăng hrơi têt hăng tơdơi têt ăt hơđong đôč pioh bơwih brơi kơ mơnuih ƀôn sang blơi yua.

Kiăng hơđong nua sĭ mơdrô amăng bơyan rơnuč thun hăng čơkă thun phrâo djuai ania ta, têt Ất Tỵ 2025, Jơnum min mơnuih ƀôn sang tơring čar Dak Lak hơmâo pơkra hơdră djă pioh gơnam sĭ mơdrô či kiăng biă mă. Ră anai, 11 boh sang bruă sĭ mơdrô pơprong hơmâo prăp lui lu gơnam tam abih tih rơnoh prăk 507 klai, kiăng djop rơbêh 36% rơnoh či kiăng blơi mơ̆ng mơnuih ƀôn sang. Gơnam sĭ mơdrô ngă hơđong nua kah hăng braih huă, mơnong ƀong huă, añăm mơnong čuh tă hlâo, mơnong mơnŭ bip, un bui, ia rơmă, sik, tơpung mih, anăm pơtam asăt, hơbơi pơtơi, boh troh laih anun gơnam yua pơkra ming ngă ƀâo bơngưi añăm pơtam. Bruă ngă hơđong nua sĭ mơdrô pok pơhai dơ̆ng mơ̆ng lơ 15/12/2024 truh abih lơ 28/2/2025. Ơi Lưu Văn Khôi, Khua Gơnong bruă wai lăng tuh tia pơkra ming hăng sĭ mơdrô tơring čar Dak Lak brơi thâo, hăng bruă ngă pơhlôm djop gơnam sĭ mơdrô, bruă mă hyu sem lăng, pel ĕp, wai lăng anih anom sĭ mơdrô Têt dưi hơmâo sang bruă đing nao tong ten ƀơi djop sang bruă laih anun pok pơhai sa amăng plĕ:

Ƀing gơmơi ăt krăo lăng tong ten anŏ pơblih amăng anih anom sĭ mơdrô laih anun tañ ba tơbiă lu hơdră bong glăi anŏ ƀu găl kiăng pơdjop gơnam sĭ mơdrô, laih dơ̆ng pơtrut pơsur djop sang bruă sĭ mơdrô pơkra ming, ba hyu sĭ mơdrô, bơwih brơi gơnam mơnuih ƀôn sang blơi yua amăng bơyan ƀong têt ngă yang thun phrâo.

Hăng anŏ prăp lui tong ten djop mơta gơnam sĭ mơdrô, hơdră pơtrut pơsur sĭ mơdrô hăng pơhlôm hiam klă gơnam sĭ mơdrô, anih anom sĭ mơdrô Têt Ất Tỵ 2025 ƀơi Dak Lak hơmâo pre lui djop laih gơnam pioh sĭ mơdrô kơ mơnuih ƀôn sang blơi yua.