Hlâo kơ bơyan čơkă thun phrâo tui phiăn juăt Ất Tỵ 2025 hăng pioh hơdor 95 thun hrơi akŏ pơjing Ping gah Cộng sản Việt Nam (3/2/1930-3/2/2025), tlam lơ 14/1, Khua mir sir ơi Lương Cường hăng grup hyu mă bruă gơnong glông hơmâo nao čuă hăng pơpŭ thun phrâo Khua mir sir hơđăp ơi Trương Tấn Sang hăng Nguyễn Minh Triết. Khua mir sir ơi Lương Cường pơpŭ bơni hơdôm tơlơi gum pơgôp prong prin mơng dua čô khua mir sir hơđăp amăng bruă ngă hơkrŭ mơng Ping gah, hrưn đĭ kơdrưh ang, tơlơi đăo gơnang lŏn ia hăng hơkrŭ pran gum pơgôp djop djuai ania.

Ƀrô bơyan čơkă thun phrâo Ất Tỵ 2025 pơ anăp, Khua mir sir hơmâo jao gơnam tết brơi Khua mir sir hơđăp ơi Trương Tấn Sang hăng Nguyễn Minh Triết, pơpŭ dua gơñu hăng sang anŏ čơkă thun phrâo suaih pral, yâo mơ-ak, truh kih, čơkă bơyan bơnga Ất Tỵ mơ-ak mơ-ai, pơđao pran jua. Khua mir sir hơđăp ơi Nguyễn Minh Triết hăng ơi Trương Tấn Sang pơdah pran jua ol kơdol hăng prap khăp pap, tơlơi đing nao mơng Khua mia Ping gah, kơnuk kơna lăi hrŏm hăng khua mir sir ơi Lương Cường hnun mơn; laih dong đăo gơnang lŏn ia ta amra anăp nao thun 2025 kjăp phik tui tơlơi git gai mơng Ping gah, ba glăi lu tơlơi truh kih prong ƀiă dong, pơtrut hrưn đĭ kơtang amăng bruă pơjing hăng pơđĭ kyar lŏn ia.