Nao čuă, bơni hơ-ơč tê̆t ƀơi Anom bruă tơhan rŭi hyu hơdeč Cảnh sát Cơ động - Kông an tơring čar Kon Tum, Kơ-iăng khua git gai pơ ala mơnuih ƀôn sang dêh čar ơi Trần Quang Phương tơña bla ƀing tơhan bruă prăp rơmet čơkă tê̆t, biă ñu bruă dŏ gak pơhlôm rơnuk rơnua amăng bơyan hlâo, amăng hăng tơdơi kơ Tê̆t ngă yang thun Ất Tỵ 2025. Pơ ala kơ khua mua mơ̆ng Ping gah, Kơnuk kơna, Kơ-iăng khua git gai pơ ala mơnuih ƀôn sang dêh čar bơni hơ-ơč kơ ƀing khua, ling tơhan hrŏm hăng sang anŏ thun phrâo hiam drơi jăn pran jua, ngă truh kih djŏp bruă Ping gah, Kơnuk kơna hăng Mơnuih ƀôn sang jao.

Hlâo kơ anun, Kơ-iăng khua git gai pơ ala mơnuih ƀôn sang dêh čar ơi Trần Quang Phương hrŏm hăng grup khua mua nao čuă, bơni hơ-ơč tê̆t ngă yang thun phrâo Ất Tỵ 2025 kơ Amĭ Việt Nam Sông kơtang Đặng Thị Thu, dŏ ƀơi phường Duy Tân, plơi prong Kon Tum; nao čuă sang anŏ ơi Sô Lây Tăng, ding kơna hơđăp Ping gah, Khua git gai Ping gah hơđăp, Khua grup pơ ala mơnuih ƀôn sang dêh čar tơring čar Kon Tum. Hrŏm amăng lơ 14/1 mơn, Kơ-iăng khua git gai pơ ala mơnuih ƀôn sang dêh čar ơi Trần Quang Phương hrŏm hăng grup khua mơ̆ng gơnong dlông nao čuă, bơni hơ-ơč tê̆t kơ gong gai, mơnuih ƀôn sang să Sa Loong hăng ƀing khua, ling tơhan hơdôm puih kơđông ƀơi guai lŏn ia Ngọc Hồi, tơring čar Kon Tum. Ƀơi plơi prong Kon Tum, nao čuă, bơni hơ-ơč tê̆t kơ Ping gah tơring čar, Jơnum min mơnuih ƀôn sang tơring čar, Anom git gai tơhan tơring čar, Anom git gai tơhan pơgang guai tơring čar hăng Kông an tơring čar Kon Tum./.