Hơdôm thun laih rơgao, tơlơi ngă giăng mah, rô nao rai plah wah dua boh tơring čar ăt hơđong đôč, hơmâo 14 grup khua mua pơblih nao rai čuă jơmư trư găn; lu bruă ngă hrŏm pơphun ĕp tơlơi sĭ mơdrô, pơtruh nao rai hăng ƀing ngă bruă mơdrô, jĕ giăm, ngui ngor  mơak gru grua adoh suang, tuai čuă ngui hăng mơnuih ƀôn sang bưp nao rai hơmâo pok pơhai klă.

Ƀing ngă bruă mơdrô mơ̆ng Dak Lak ăt nao tuh pơ alin pla, wai lăng, kuah kơtăk kơsu ƀơi tơring čar Mondulkiri, hăng rơbêh 1.623 ha đang kơsu. Dua bơnah ngă hrŏm wai pơgang jơlan guai dêh čar rơbêh 72 km hăng hơduah ĕp, rŭ kuai tơlang tơhan djai pơsăn drơi jăn yua kơ lơ̆n ia, ba glăi pơ dêh čar. Mơ̆ng thun 2026-2030, dua bơnah tơring čar ăt amra pơtrut tañ bruă ngă hmua hơđong, pơgang glai rưng, pơgang lu djuai mơnong hơdip, pơtrut bruă pok bah amăng jang jơlan guai dêh čar Dak Ruê-Chi Miêt, tuh pơ alin čuk pơkra jơlan dưi pơtruh nao rai, pơgăn ƀing soh sat găn rơgao nao rai ƀơi guai dêh čar, pơtrut pơđĭ kyar bruă tuai čuă ngui, pơtô pơjuăt hăng bruă ia jrao, ngă adơi ayong, giăng mah djop plơi pla dua bơnah ƀơi guai dêh čar .