Ƀơi tơdrun mă akan hơdang Phú Lạc, phương Hòa Hiệp, hlâo kơ kơ ƀattô hyu mă akan hơdang, hơdôm tơlơi gêh gal kơ hră pơ-ar, gơnam măi mok krăo lăng kơ bruă hyu mă akan hơdang hăng kual mă akan hơmâo pel ĕp, črâo ba. Hơdôm boh ƀattô aka ƀu djop tơlơi gal amra ƀu brơi tơbiă mơng tơdrun. Ơi Phan Thanh Lực, pô wai lăng tơdrun mă akan Phú Lạc brơi thâo, hrŏm hăng bruă wai lăng mơng anom bruă bơdjơ̆ nao, bruă pơtô pơblang na nao djru brơi mơnuih hyu mă akan hơdang thâo rơđah dong hơdôm tơlơi pơkă kiăng ngă tui mơtăm lơm glăk prap lui hyu mă akan hơdang. “Djop anih anom ba pơmut neh met wa kiăng bĕ hĭ 3 tơlơi ƀu dưi ngă. Kiăng tong ten anih hyu mă, sit biă ñ lĕ anăm mut nao kual ia rơsĭ dêh čar pơkŏn”.

Thiếu tá Lương Công Hậu, kơ-iăng Khua pioh kơđông tơhan wai pơgang guai Hòa Hiệp Nam brơi thâo, bruă wai lăng hơmâo ngă tui na nao lơm ƀattô hyu mă akan. Truh ră anai, ƀơi kual anai ƀu hơmâo ƀattô dong amăng grup “3 tơlơi ƀu dưi ngă”; hơdôm boh ƀattô hơmâo dưm truă măi krăo lăng glông hyu mă akan hăng kiăng ngă tui tơlơi pơkă lơm măi mok răm. “Neh met wa mă akan ngă tui klă hơdôm tơlơi pơkă kơ bruă pơgang, pơgăn mă akan hơdang ča čot IUU. Ră anai, amăng kual ƀu hơmâo ƀattô mă akan hơpă dong amăng grup “3 tơlơi ƀu dưi ngă”. Djop ƀattô lêng kơ dưm truă djop măi krăo lăng kơ glông hyu mă hăng ngă tui djơ̆ hơdôm tơlơi pơkă kơ bruă pơkra ming lơm măi răm rai, kiăng pơhlôm djơ̆ tơlơi pơkă amăng tơlơi phiăn”.

Ƀu djơ̆ kơnong wai lăng ƀơi tơdrun, gong gai ƀon lan ăt ba bruă wai lăng ƀattô tơl hơdôm kual plơi pla. Ƀơi hơdôm boh ƀon lan hlâo adih juăt ƀu ngă soh tơlơi pơkă mă akan IUU, hơdôm kual plơi pla gum hrŏm hăng anom bruă bơdjơ̆ nao wai lăng ƀattô hluai tui hơdôm grup ƀattô rơnuk rơnua; pô mơgăt hơmâo pơtô pơblang, kĭ tơlơi ƀuăn, amăng anun đing nao biă mă hơdôm ƀattô mă akan ngừ.

Hăng hơdôm boh ƀattô djop tơlơi gal hyu mă akan, gong gai pơphun krăo lăng ƀơi anih akă 24 mông rĭm hrơi. Ƀơi phương Phú Yên, anih hơmâo ƀattô mă akan ngừ juăt hyu mă amăng kual ia rơsĭ ataih ayaih. Ơi Nguyễn Xuân Cảnh, Khua Jơnum min mơnuih ƀon sang phương Phú Yên brơi thâo, bruă wai lăng ƀattô hơmâo pok pơhai hăng tơlơi gum hrŏm mơng gong gai, tơhan wai pơgang guai, tơdrun mă akan hăng kual plơi pla. “Bơdjơ̆ nao bruă pơgăn mă akan ča čot IUU, ƀing gơmơi hơmâo git gai hơdôm anih anom bơdjơ̆ nao gum hrŏm kjăp hăng Puih kơđong tơhan wai pơgang guai Đà Nẵng kah hăng tơdrun mă akan kiăng ngă tui klă bruă anai; laih dong gum hrŏm hăng kual plơi pla wai lăng kjăp ƀattô kah hăng ƀing mơgăt lơm hyu mă akan, rĭm hrơi kiăng kiăo tui lăng, phĭn rup hăng lăi pơthâo tui djơ̆ tơlơi pơkă”.

Hrŏm hăng wai lăng, tơring čar Dak lak glăk pơplih djop mơta bruă pơtô pơblang kiăng hơdôm tơlơi pơkă pơgăn mă akan hơdang ča čot IUU tơl mơnuih mă akan hơdang kiăng kơ pơhlôm ƀơi anăp hăng tŏ tui na nao. Ƀơi phương Xuân Đài, ƀing apăn bruă hyu pơblang brơi mơnuih ƀôn sang Puih kơđong tơhan wai pơgang guai Xuân Đài ƀu djơ̆ kơnong pơtô pơblang amăng hơdôm mông jơnum amăng plơi pla đôč ôh mơ̆ ăt tơl rĭm boh plơi pla, rĭm boh sang anŏ. Thượng Úy Nguyễn Văn Liến, kơ-iăng Khua grup pơtô pơblang brơi mơnuih ƀôn sang Puih kơđông tơhan wai pơgang guai Xuân Đài brơi thâo, lu ƀattô mă akan lơm pot glăi pơ hang, ling tơhan khŏm yua loa pôr pơhing hrŏm hăng ba hyu hră pơ-ar rôk tui jơlan, kual plơi pla, tơdrun mă akan hăng hơdôm anih mơnuih mă akan hơdang juăt pơtum pơƀut. “Hơbô̆ bruă ‘Jua pôr pơhing tơhan wai pơgang guai’ tơdơi kơ pơphun ngă tui hơmâo ba glăi boh tŭ yua. Hăng bruă pôr pơhing amăng loa rôk tui jơlan glông, amăng kual plơi pla hăng tơdrun mă akan, hơdôm tơlơi pơhing kơ bruă pơgang, pơgăn mă akan hơdang ča čot amra mơ-it nao neh met wa, djru brơi neh met wa tañ thâo hloh.”

Tơlơi kơđŏm glăi yôm hloh lĕ bruă pơblang pơgăn mă akan hơdang ča čot IUU glăk ƀơƀrư̆ pơplih mơng bruă lăi pơthâo tơlơi pơkă hơdai nao pơjing tơlơi juăt ngă tui djơ̆ mơng mơnuih mă akan hơdang. Hơdôm tơlơi rơkâo kơ kual hyu mă, hră pơ-ar ƀattô, mơnuh hyu mă, anih hyu mă, măi krăo lăng kơ glông hyu mă akan ƀudah lăi pơthâo lơm tơbiă, mut amăng tơdrun hơmâo lăi glăi na nao, pơlir hăng rĭm wŏt đuăi hyu amăng ia rơsĭ. Ră anai, neh met wa hyu mă akan lêng kơ thâo rơđah hăng ngă tui khut khăt hơdôm tơlơi pơkă amăng pơgăn mă akan ča čot IUU. “Ƀing gơmơi lêng kơ thâo abih laih, lêng kơ ngă tui djơ̆. Hyu mă akan hơdang kiăng djơ̆ anih, đuăi hyu amăng ia rơsĭ kiăng hơmâo djop hră pơ-ar, mơnuih hyu mă kiăng ngă hră pơ-ar, hơmâo rup. Lơm pot glăi pơ sang kiăng lăi pơthâo.”

Yap truh akŏ blan 9/2026, Dak Lak hơmâo 2.593 boh ƀattô mă akan mơng 6 met truh pơ glông, amăng anun 689 boh ƀattô mơng 15 met pơ glông; 100% boh ƀattô hơmâo čih pioh amăng anih răk pioh kơ bruă mă akan dêh čar. Bruă wai lăng ƀattô tơbiă, mut nao tơdrun, ĕp lăng anih hyu mă hăng tŏ tui pơlir VMS hơmâo kơtưn. Amăng blan 8 hăng rơwang hrơi tơjuh blung a blan 9, tơring čar ƀu ƀuh bruă ngă soh prong amăng pơgăn mă akan ča čot IUU.

Ba tơlơi pơkă mut amăng rĭm tal hyu mă, rĭm boh ƀattô hăng tơlơi răng kơđiăng mơng mơnuih ƀôn sang lĕ atur phun kiăng Dak Lak hrŏm hăng đơ đam dêh čar lŏm hĭ “kak kơñĭ”, anăp nao bruă hyu mă akan hơdang hơđong kjăp, hơmâo tơlơi glăm ba./.