Hơjan hlim yap mơ̆ng mlam kơnôl 8/9 ngă kơ lu anih amăng tơring čar Dak Lak hơmâo tơlơi truh ia dăo kơtang, kơđông jơlan nao rai. Jơnum min mơnuih ƀôn sang tơring čar Dak Lak pơtrun hiăp djop să, plơi pla pok pơhai hơdră pơhlom hlâo tơlơi truh yua hơjan hlim ăt dŏ lu hơdôm hrơi pơ anăp, hŭi ia lip prong tui. Gơnong bruă Ngă hmua hăng Ayuh hyiăng tơring čar Dak Lak brơi thâo, truh 4 mông či tlam kơnôl 9/9, hơjan hlim prong aka ƀu hơmâo tơlơi hơgĕt răm ƀăm kơ mơnuih hăng sang dŏ, hmua đang lơi.

Khă hnun, ƀơi hơdôm arăt jơlan nao rai ia dăo ngă kơđông hĭ. Ƀơi să Ia Lôp, tơdrông mrô 9 ia lip truh rơbêh dua čơgam, jơlah ia ăt hlăk đi kơtang, blai hang prong tui ƀu dưi truh nao rai. Gong gai kơnuk kơna hơmâo pơtum lu tơhan kơsung nao, dăng hrĕ, čih pơnăng lăi lui hlâo anih hŭi rơhyưt, ƀu brơi mơnuih ƀôn sang găn rơgao nao rai. Hơdôm anih ƀơi să Ea Drông, să Ea Kar, să Čuôr Dăng, tơring čar Dak Lak ăt hơmâo anih ia lip kơtang mơ̆n. Rơbêh 300 čô čơđai sang hră ƀơi dua boh sang hră, să Čuôr Dăng brơi pơdơi hrăm hră jăng jai yua ia lơ̆i kơtang rơgao tơdrông tua găn hnoh ia. Ƀơi anăp kơ tơlơi tơnap hlim hơjan ia ling dăo anai, tơring čar Dak Lak ăt pơtrun hiăp brơi tơhan hyu mă bruă, dŏ ĕp lăng ƀơi anih ia lơ̆i kơtang, hŭi lơ̆n tơhlŏm hăng pơčrâo brơi jơlan mơnuih ƀôn sang găn rơgao nao rai rơnuk rơnua hloh. Djop să, plơi pla khom hơmâo hơdră či pơđuăi mơnuih ƀôn sang mơ̆ng anih hŭi rơhyưt sit hơmâo tơlơi truh.