Sa amăng hơdôm mơta tơlơi ƀuh rơđah amăng bruă ngă tui Hră pơtrun 18 ƀơi Dak Lak lĕ bruă mă pơmut, pơtum glăi sa dua boh sang bruă, anom bruă kơnuk kơna kiăng ngă (rơbôt) hơbôt hloh bruă mă amăng kơnuk kơna pioh pơtrut boh tŭ yua lu. Ơi Trương Hòai Anh, Khua Gơnong bruă Tơlơi pơhing hăng Pôr pơthâo tơring čar Dak Lak, brơi thâo, bruă pơmut Gơnong bruă Tơlơi pơhing hăng Pôr pơthâo hrŏm hăng Gơnong bruă Boh thâo ia rơgơi phrâo jing sa lĕ, hơmâo pok pơhai ngă tui sa amăng plĕ. Abih dua boh gơnong bruă anai pơphun lu wơ̆t jơnum kiăng bơ tŭ ư hĭ hơdră či pơmut hrŏm,  dăp glăi akŏ bruă pok pơhai bruă mă pơ anăp, khom giong hlâo kơ lơ 10/1/2025.

“Gơnong bruă gơmơi hơmâo pok pơhai pơthâo brơi kơ abih bang mơnuih apăn bruă, mơnuih mă bruă apah amăng sang bruă. Hăng bruă pơmut hrŏm dua gơnong bruă Tơlơi pơhing hăng Pôr pơthâo mut hrŏm hăng Gơnong bruă Boh thâo ia rơgơi phrâo lĕ, Jơnum min mơnuih ƀôn sang tơring čar hơmâo akŏ pơjing 1 grup mă bruă truh ră anai hơmâo jơnum laih anun dua bơnah pơkra hơdră laih anun pơdah thâo hlâo kơ lơ 10/1/2025 hăng jơnum  kiăng pơsit hĭ akŏ bruă hlâo kơ lơ 15/1/2025 kiăng kơ Jơnum min mơnuih ƀôn sang tơring čar lăi pơthâo hăng sang bruă ping gah tơring čar djơ̆ hăng tơlơi phiăn pơkă”.

Ƀơi tơring glông Čư̆ Mgar, ơi Trần Đình Nhuận, Khua git gai ping gah tơring glông, ăt brơi thâo Hră pơtrun 18, Čư̆ Mgar hơmâo ngă tui pơmut sang bruă gru grua thâo thăi hăng pơrơguăt drơi jăn hăng Gong phun pơdah rup pơtui jua pơhiăp tơring glông, pơmut 8 boh sang hră, pơhrŏ 8 boh plơi pla hăng ngă giong pơhrŏ truh 10% mrô mơnuih ngă khua amăng đơ đam tơring glông. Amăng črăn phrâo pơ anăp adih, tơring glông Čư̆ Mgar rơkâo lu hơdră či pơmut glăi pơkŏn, kah hăng sang bruă wai lăng čem rông hlô mơnong, pla pơjing, pơgang phun pla jing sa boh anom bruă bơwih bơwăng bruă ngă hmua yua tơring glông wai lăng.....Hơdôm tơlơi pơblih anai ƀu kơnong ngă pơhrŏ akŏ sang bruă đôč ôh, dŏ djru kơ djop sang bruă, anom bruă mă bruă tŭ yua hloh.

“Khua mua git gai ping gah amăng tơring glông hơmâo bưp ƀing khua mua, mơnuih apăn bruă dŏ amăng thun dưi glăi pơdơi hlâo tơña lăng tơdah kiăng glăi pơdơi lĕ, bơ ră ruai hăng gơñu brơi pơdơi abih thun bruă hlâo kơ truh thun pơkă laih anun tŭ mă prăk djru tui hăng tơlơi phiăn pơkă, truh ră anai hơmâo sa čô khua anom bruă hăng 5 čô kơ-iăng khua anom bruă ngă hră rơkâo pơdơi”.

Ơi Bạch Văn Mạnh, Khua Gơnong bruă wai lăng bruă čar, ăt lăi pơtong, tơdơi kơ 7 thun ngă tui Hră pơtrun 18, tơring čar Dak Lak hơmâo hrŏ hĭ 10% mrô mơnuih apăn bruă sit nik, pơkă hăng thun 2015, hrŏ 30 boh anom, sang bruă yua Gơnong bruă ƀơi tơring čar wai lăng, laih anun hrŏ 40 boh anom, sang bruă bơkơnar hăng anom bruă gah yŭ kơ Gơnong bruă. Anai lĕ sa boh tơhnal lăp čih pioh hăng bơni biă mă, ƀu kơnong pơdah rai bruă mă khut khăt pơsir kiăng hơbôt hloh amăng sang bruă kơnuk kơna đôč ôh, dŏ djru kơ bruă git gai wai lăng mơ̆ng kơnuk kơna tŭ yua hloh. Thun blan pơ anăp, tơring čar Dak Lak ăt pơtrut ngă tui bruă pơmut lu sang bruă, gơnong bruă, anom bruă pơhrŏ hĭ mrô mơnuih ngă khua, apăn bruă phun kiăng ƀiă mơnuih samơ̆ git gai tŭ yua hloh. Ơi Bạch Văn Mạnh brơi thâo:

“Ƀing gơmơi hơmâo ngă giong laih akŏ bruă pơphun glăi sang bruă kơnuk kơna phrâo laih anun pơmut glăi. Jơnum min mơnuih ƀôn sang tơring čar git gai Gơnong bruă wai lăng bruă čar ngă hrŏm djop sang bruă akŏ pơjing 8 grup amăng anun Khua jơnum min mơnuih ƀôn sang tơring čar ngă hrŏm amăng 2 grup hăng dua čô kơ-iăng khua lĕ ngă hrŏm djop grup kiăng bơ tŭ ư sa hơnơ̆ng. Lu grup ăt hơmâo pơmut hrŏm tŭ ư laih. Tơhnal ngă bruă hmar, tañ biă mă”.

Anom bruă ping gah tơring čar Dak Lak hơmâo pơtong rơđah Hră pơtrun 18 lĕ sa bruă mă phun yom, ƀu dưi ngă rơnang hăng kơdŭn glăi ôh. Ơi Nguyễn Đình Trung, Khua git gai ping gah tơring čar Dak Lak, lăi pơtong: “Anai lĕ bruă mă kah hăng sa tơlơi hơkrŭ kiăng ngă hơbôt glăi sang bruă, mrô mơnuih mă bruă kơnuk kơna, ngă tui hmar hloh klă hloh, hơmâo anŏ gêh găl kơ bruă pơđĭ kyar lŏn ia”. Tơring čar Dak Lak ngă tui hơdră “Đuăi rah dăp glông rah”, pơtum nao bruă mă pok pơhai bruă mă hăng pran jua gir run khut khăt hloh, laih dơ̆ng ăt ngă djơ̆ hrŏm sa hơnơ̆ng, bơ tŭ ư nao rai plah wah djop gong gai kơnuk kơna mơ̆ng gơnong dlông truh pơ plơi pla:

“Pơblih phrâo, dăp glăi sang bruă kơnuk kơna amăng glông bruă kơđi čar hơbôt hloh hăng bruă mă sit nik, tŭ yua amăng djop bruă pơtrun yom phara, sa bruă mă khơkrŭ kiăng ngă hơbôt glăi sang bruă amăng kơnuk kơna mơ̆ng djop glông bruă kơđi čar, hrŏm hăng lu tơlơi tơnap tap, gleh glar, bơbeč djơ̆ lu mơtam tơlơi pơmin, pran jua ƀing khua mua, mơnuih apăn bruă amăng glông bruă kơđi čar. Tui anun kiăng hơmâo tơlơi gum pơgôp sa pran jua, mut hrŏm tŭ ư sa hơnơ̆ng, gir run lu hloh kiăng pơgang boh tŭ yua hrŏm amăng tơring čar”.

Hăng tơlơi gir run hrŏm abih bang glông bruă kơđi čar, mơ̆ng tơring čar truh pơ tơring glông, laih anun hơmâo tơlơi git gai tong ten mơ̆ng khua mua tơring čar, Dak Lak hlăk gir run abih pran jua ngă tui Hră pơtrun 18 hăng tơlơi kiăng “pơblih phrâo, dăp glăi pơphun sang bruă amăng glông bruă kơđi čar hơbôt hloh, mă bruă sit, tŭ yua”. Hơdôm boh tơhnal dưi ngă brơi ƀuh, anŏ mut hrŏm sa pran jua, găn rơgao hĭ tơlơi lông lăng, tơnap tap, tơring čar Dak Lak ăt anăp nao rơbat djơ̆ jơlan hăng angă atur kơjăp kơ anŏ pơđĭ kyar kơñ pơgi ani anăp.