Dua kơčăo bruă anai hơmâo Kual plơi prong ƀut plơi 8, prong rơbêh 19ha, nua blung a rơbêh 1.682 klai prăk; hăng Kual plơi prong hơmâo anih anom glai rưng hiam, anih čuă ngui amăng plơi pla Dak Lăk, prong rơbêh 44 ha, nua năng blung lĕ 2.321 klai prăk. Dua kơčăo bruă anai leng kơ pơphun jơnum pơjuă nua ĕp pô gơgrong man pơdong, laih anun glăk ngă giong hră pơ-ar. Ƀơi Kual plơi prong anih anom glai rưng hiam, gru grua, djuai ania, čơkă tuai Dak Lăk, bruă čuk pơkra, pơklaih ala lŏn glăk tơnap yua hơmâo mơn lŏn ala ƀu hơmâo hră yua lŏn, ƀu thâo lŏn mơ̆ng pơpă ôh, lơ̆m anun prăk pioh ngă bruă dŏ kơƀah yua rơgao kơ rơnoh tuh pơ alin.

Nao lăng pơ kual dơnao Ea Nao, rôk tui kual lŏn gah Ngŏ mơ̆ng Kual plơi prong anih anom glai rưng hiam, gru grua čơkă tuai hyu ngui amăng plơi pla Dak Lăk, Khua jơnum min mơnuih ƀôn sang tơring čar Dak Lăk ơi Đỗ Hữu Huy lăi, gru kač pơkra anih anom ră anai aka ƀu mă yua abih anŏ gêh găl mơ̆ng anih anom, glai klô, čroh hnoh, lŏn tơnah jum dar dơnao ôh. Ñu kiăng kơsem min pơplih glăi bruă dưm dăp, prăp rơmet anih bơwih brơi lăp djơ̆, ƀrô ngă hiam anih anom, ƀrô hơmâo prăk đah mơ̆ng dưi man pơkra anih anom, jơlan nao rai hăng pơkra ming, pơhrup hiam amăng kual./.