Tui lăi pơthâo mơng grup pel ĕp mrô 26, Khul apăn bruă Ping gah tơring čar Dak Lak hơmâo gơgrong hruă kjăp, pok pơhai ngă tui hơdôm tơlơi črâo trun, tơlơi pơtrun mơng gơnong glông. Tơring čar hơmâo hmao tlôn dưm dăp glăi anih anom, pơtrut tañ bruă kah gưl, bruă jao, pơplih ngă hră pơ-ar hăng pơplih mrô. Hăng bruă jao pơđĭ kyar bơwih ƀong huă, Dak Lak hơmâo pơjing jơlan gah pơđĭ kyar amăng rĭm thun, rĭm gơnong bruă, bruă mă; akŏ pơjing Khul git gai ngă tui hơnong pơkă pơđĭ kyar dua mrô, laih dong ba tơbiă lu hơdră bruă kiăng pơtrut pơđĭ kyar bơwih ƀong huă-mơnuih mơnam. Lơm pok pơhai tơlơi pơtrun mrô 57, tơring čar ăt gir run ngă tui hơdôm bruă jao, hơdră bruă amăng yua boh thâo phrâo, pơplih pơčeh phrâo hăng pơplih mrô.

Hăng hơdôm hơnong pơkă pơđĭ kyar bơwih ƀong huă dua mrô, grup pel ĕp pơsit bruă jao hơnong pơkă pơđĭ kyar brơi 102 boh să, phương dŏ kơƀah boh thâo mrô. Boh than ngă tui hơdôm bruă jao rơwang tal I kah hăng bruă pơđĭ kyar ră anai aka ƀu lăp djơ̆ hăng jơlan gah ba tơbiă. Lơm anun, sa, dua bruă hơmâo tơlơi dưi, tơlơi gal prong anun lĕ tuai čuă ngui, đang glai ăt aka ƀu ngă tui djơ̆ tơlơi dưi, pơgôp amăng pơđĭ kyar bơwih ƀong huă amăng tơring čar dŏ aset.

Amăng pok pơhai tơlơi pơtrun mrô 57, sa, dua boh ƀon lan ăt bưp tơnap tap amăng bruă ngă tui bruă jao. Ră anai ăt hơmâo 56 hră pơ-ar bơdjơ̆ nao truh pơ bruă pơgiong tơhnal pơkă amăng bruă yua boh thâo phrâo, pơplih pơčeh phrâo hăng pơplih mrô aka ƀu pơsir hĭ. Gơnam măi mok, anih djă pioh hăng djop tơlơi gal djru brơi pơplih mrô, sit biă ñu ƀơi kual ataih, asuek ăt aka ƀu klă, bơdjơ̆ nao bruă pok pơhai hơdôm bruă jao.

Amăng mông mă bruă, tơring čar Dak Lak hơmâo rơkâo gơnong glông sem lăng pơsir hĭ hơdôm tơlơi gun bơdjơ̆ nao lŏn ngă đang hmua, đang glai; kơsem min bruă dưm dăp pơmut hrŏm hơdôm boh să đơđet; pơgiong hơdôm hơdră djru brơi ƀing apăn bruă ƀơi ƀon lan hăng tŏ tui đing nao tuh pơ alin man pơkra anih anom. Laih dong, ƀon lan ăt rơkâo sa, dua tơhnal pơkă phara kiăng ba glăi tơlơi dưi hăng pơtrut pơđĭ kyar pơ anăp dong. Khua git gai Ping gah tơring čar Dak Lak ơi Lương Nguyễn Minh Triết brơi thâo: “Rơkâo grup hơmâo hră lăi pơthâo kiăng tơring čar ngă tui tơlơi pơtrun mrô 72 mơng Ƀirô Khua pơ ala mơnuih ƀon sang dêh čar kơ ngă lông lăng sa, dua tơhnal pơkă phara brơi plơi prong Buôn Ma Thuột, gir run pơjing Buôn Ma Thuột jing plơi prong phun ƀơi kual Dap kơdư, kiăng đing nao pơđĭ kyar brơi kơ kual anai; dua dong lĕ kual Ngŏ hơmâo kual bơwih ƀong Dơnung Phú Yên, tơdah kiăng pơđĭ kyar dua mrô ăt kiăng gơnang nao kual anai. Ƀing gơmơi rơkâo ngă tui tơlơi pơtrun mrô 127 thun 2012 mơng Kơnuk kơna kar hăng kual bơwih ƀong kơdư Vân Phong kiăng hơmâo tơhnal pơkă pơhưč tuh pơ alin amăng kual anai”.

Lăng glăi boh than ngă tui hơdôm bruă jao pơđĭ kyar bơwih ƀong huă-mơnuih mơnam mơng tơring čar Dak Lak, ơi Nguyễn Thanh Nghị brơi thâo, rơnoh pơđĭ kyar ră anai mơng tơring čar ăt dŏ ataih mơng hơnong pơkă pơđĭ kyar dua mrô hơmâo ba tơbiă. Bruă pơđĭ kyar aka ƀu lăp djơ̆ hăng tơlơi dưi, tơlơi gal mơng tơring čar. Yua boh thâo phrâo, pơplih pơčeh phrâo hăng pơplih mrô aka ƀu jing tơlơi pơtrut yôm phăn amăng pơđĭ kyar bơwih ƀong huă.

Khua grup pel ĕp mrô 26 rơkâo tơring čar tŏ tui pel ĕp djop mơta ngăn rơnoh amăng tơring čar; đing nao pơsir hĭ hơdôm tơlơi gun kơ bruă ngă hră pơ-ar, bruă tuh pơ alin bơwih ƀong sĭ mơdrô; hrưn đĭ klă bruă wai lăng, pơtrut pơplih mrô hăng ngă tui ha amăng plĕ hơdôm bruă pơtrut yôm, sit biă ñu pơđi kyar mơnuih mă bruă kiăng pok phư ngăn rơnoh pơđĭ kyar tañ hăng hơđong kjăp. “Rơkâo ƀing apăn bruă pel ĕp glăi hơdôm ngăn rơnoh amăng tơring čar kiăng mă yua pơtrut pơđĭ kyar; ĕp lăng glăi bruă ngă hră pơ-ar, bruă tuh pơ alin bơwih ƀong sĭ mơdrô amăng tơring čar, pơplih ngă hră pơ-ar, wai lăng bruă pơplih mrô hiưm pă ñu, rơkâo ƀing apăn bruă đing nao pơsir hĭ hơdôm tơlơi gun kiăng pok phư ngăn rơnoh hăng ngă tui ha amăng plĕ brơi klă hloh amăng pơtrut tañ jơlan gah ngă bruă phun, sit biă ñu lĕ mơnuih mă bruă”./.