Kiăng pơtrut ngă tañ bruă čuk pơkra pơklaih ala lŏn hăng 53 ring bruă akŏ phun, tơring čar Dak Lăk hơmâo akŏ pơdong 5 Grup mă bruă mơ̆ng Ping gah tơring čar, yua Khua ping gah hăng ƀing Kơ-iăng khua ping gah tơring čar ngă Khua grup. Anai jing hơdôm bruă dŏ hơmâo lu hră pơ-ar, anŏ tơnap, dŏ gun gah lŏn sang đang hmua, duh ba lŏn, pơdong plơi phrâo sui thun yun blan.

Tơdơi kơ 45 hrơi pok pơhai čuk pơkra pơklaih ala lŏn, 7 kơčăo bruă hơmâo ngă giong 100% bruă pơklaih ala lŏn či man pơkra ring bruă; 15 kơčăo bruă hơmâo mơ̆ng 90% truh pơ ngŏ. Dưi ngă lĕ yua hơmâo hơdôm Grup mă bruă trun nao tơl anih, hrŏm hăng plơi pla, pô tuh pơ alin pơtŏng lăng rơđah djŏp anŏ gun, pơsit rơđah bruă hơget kiăng pơsir laih anun tơlơi gơgrong mơ̆ng rim anom bruă. Hrŏm hăng anun, kơƀang pơkă hrơi mông ngă bruă hơmâo čih pơthâo rim hrơi, djru ba ƀing khua tơring čar tañ thân krăn bruă hơget thơ amuñ ngă kaih đah mơ̆ng tañ git gai pơklaih brơi. Mơ̆ng bruă anai, Khua ping gah tơring čar Dak Lăk ơi Lương Nguyễn Minh Triết pơtŏng sit, hơdôm anŏ gun mơ̆ng hơdôm kơčăo bruă sit nik hơmâo ƀơi bruă pơphun ngă năng blung: “Lu bruă hlâo adih ƀing ta lăng tơnap, lăi hơmâo tơlơi gun gah tơlơi phiăn, tơlơi pơkă, hơdră djru, samơ̆ lơ̆m ƀing khua trun nao tơl anih, hrŏm hăng hơdôm anom bruă, rim čô khua, mơnuih gơgrong pơklaih lŏn sang đang hmua či man pơkra ring bruă pơtŏng lăng rơđah rim mơta bruă, pơsit rơđah tơlơi gơgrong, rơđah hrơi blan ngă bruă, jing lu bruă dưi pơsir hĭ mơn”.

Tơdah pok ala lŏn či man pơkra ring bruă jing sa amăng hơdôm bruă yom či ba ngă kơčăo bruă, jing bruă brơi prăk či ngă bruă jing tơlơi glêh tơnap biă mă hăng Dak Lăk amăng hơdôm blan rơnuč thun. Ƀơi mông jơnum tui tơđar blan 8 rơgao, khua mua tơring čar pioh lu mông pơtŏng glăi hrơi mông brơi nao prăk kăk. Bruă tuh pơ alin thun 2026 mơ̆ng Dak Lăk rơbêh 11.294 klai prăk. Truh ră anai, tơring čar hơmâo kah pơpha rơbêh 9.918 klai prăk, jing hơmâo giăm 88%. Lăp đing nao, dŏ hơmâo 1.375 klai prăk aka ƀu dưi jao prăk ôh.

Tui hăng Khua gơnong bruă prăk tơring čar Dak Lăk ơi Cao Đình Huy, blan 8 tui hăng bruă prăp hlâo lĕ khŏm brơi nao aset biă ñu 3.000 klai prăk, samơ̆ sit biă ñu glăk hơmâo năng ai 604 klai prăk. Kiăng dưi brơi nao prăk djơ̆ hăng akŏ bruă 3 blan tal 3, kơnong amăng blan 9, tơring čar khŏm brơi nao năng ai 5.154 klai. Gơnong bruă prăk hơmâo ngă bruă hăng pô tuh pơ alin, kiăng kĭ pơkôl ngă bruă giong djơ̆ hrơi pơkă: “Ră anai Gơnong bruă prăk amra lăi pơthâo hăng gơnong dlông mă yua prăk jăng jai laih anun kơnong brơi kơ hơdôm kơčăo bruă hơmâo sem lăng tong ten či ba mă yua laih. Rim wơ̆t hrơi tơjuh, gơmơi amra rơkâo hơdôm Anom bruă wai lăng, hơmâo tơlơi pơsir hiưm pă lĕ gơmơi brơi nao hlao prăk hăng hơdôm bruă hơmâo ngă giong. Tơdah ƀing gơñu ƀu hơmâo djŏp anŏ pơkă či brơi nao prăk lĕ gơmơi pơhrui glăi, brơi kơ hơdôm bruă prong pơkŏn dong”.

Ră anai năng ai 60% anŏ tơnap bruă brơi prăk tuh pơ alin mơ̆ng Dak Lăk pơƀut ƀơi 4 Khul wai lăng, hơmâo Khul wai lăng jơlan nao rai hăng Ngă hmua, Khul Tuh pơ alin man pơdong gah Ngŏ, Khul Buôn Ma Thuột hăng Khul Tuy Hòa. Ƀơi anăp tơlơi kiăng pơplih rơđah amăng bruă tuh pơ alin, pơklaih ala lŏn hăng hơdôm ring bruă akŏ phun, Khua jơnum min mơnuih ƀôn sang tơring čar Dak Lăk ơi Đỗ Hữu Huy kiăng lăi pơthâo rơđah tơlơi dưi brơi prăk kơ rim kơčăo bruă, rim bruă kiăng ngă; khut ba pơđuăi prăk kăk mơ̆ng kơčăo bruă ƀu dưi ngă, pioh kơ kơčăo bruă pơkŏn dưi ngă hloh dong. Khua mua tơring čar ăt kiăng pel ĕp sit nik ƀơi ring bruă, pơtŏng lăng tơlơi rơgơi ngă bruă mơ̆ng pô gơgrong tuh pơ alin. Sang bruă pơjuă nua tuh pơ alin ƀu djơ̆ hăng tơlơi kiăng lĕ khŏm sem glăi, pơplih hĭ, hŭi kơ bruă man pơkra ƀu klă, ngă bruă tơdu jing ngă tơnap, ngă kaih bruă man pơdong hăng bruă brơi nao prăk: “Anom bruă khŏm lăi pơthâo kơ Khua mua Jơnum min mơnuih ƀôn sang tơring čar jao bruă kơ khua mua Jơnum min gơgrong wai lăng rim sang bruă tuh pơ alin hăng bruă hyu sem, pơsur ngă rim ring bruă. Nao tơl ring bruă, anih man pơkra, lăng dlăng pô gơgrong ngă hơmâo djŏp măi mok, hơmâo djŏp kông ñơn mơn; djă ba abih hră čih pioh bruă man pơdong či sem lăng. Lăng glăi pơhlom  mơ̆ng hrơi anai truh abih thun hơmâo brơi nao prăk kăk hơdôm pă. Tơdah amăng mông ngă bruă hơmâo anŏ gun thơ, pơsit rơđah yua pô gơgrong bruă ƀu dưi ngă bruă, ngă bruă tơdu, ta khŏm plih pô ngă mơtăm yơh”.

Mơ̆ng bruă pơklaih lŏn sang đang hmua či man pơdong ring bruă, truh kơ bruă brơi nao prăk tuh pơ alin, Dak Lăk glăk pơƀut ƀơi hơdră ngă bruă phrâo: kiăo tlôn ring bruă, sem lăng tong ten, pơsir brơi rim anŏ kơđông, laih anun bruă ngă kaih khŏm hơmâo tơlơi bơtơhmal. Anai hơmâo lăng jing bruă yom či pơplih amăng hơdôm blan rơnuč thun, pơtrut ngă tañ ring bruă, mă yua klă prăk kơnuk kơna jao, laih anun tañ ba yua hơdôm ring bruă akŏ phun, ba glăi boh tŭ yua kơtang hloh.