Hơdôm drơi asâo sang anŏ ayong Y Bruat Niê, dŏ ƀơi plơi Ea Phê, să Ea Phê, tơring glông Krông Pač rông rơbêh 3 thun samơ̆ aka ƀu ba nao tlâ̆o ia jrao pơgang hŭi djơ̆ tuai. Ñu brơi thâo, yua prưh lui asâo gah rơngiao sui laih, ñu hŭi lơ̆m mă krưh pioh tlâ̆o ia jrao, asâo amra akĕ mơtăm yơh.  

“Sui laih sang anŏ ƀu ba nao tlâ̆o, asâo ania hăng ană ñu gơmơi ƀu khin nao giăm ôh yua anun aka ƀu dưi mă. Tơdah mă ñu amra akĕ, hŭi ñu akĕ yua anun aka ƀu ba nao tlâ̆o. Yua hŭi rơhyưt lơ̆m asâo akĕ amra djơ̆ tuai, tơdah ƀu ba nao pơ sang ia jrao hmao tlôn amra ngă djai mơnuih mơtăm”.

Hmư̆ amăng loa pôr pơhing mơng să kơ hrơi mông tlâ̆o pơgang brơi asâo, eo, sang anŏ ayong Ngô Quốc Đạt, dŏ ƀơi să Ea Kuăng, tơring glông Krông Pač, tơring čar Dak Lak prap rơmet bruă mă kiăng kơ dŏ tơguăn ƀing tlâ̆o pơgang nao tlâ̆o brơi 3 drơi asâo amăng sang anŏ. Ñu brơi thâo, ƀơi anai sang anŏ hơpă lêng kơ rông ƀiă biă mă ñu sa drơi asâo, eo samơ̆ aka ƀu hơmâo hlơi ôh ba nao tlâ̆o pơgang, mơ̆ dŏ tơguăn arăng rai tlâ̆o tơl sang:

“Ruă djơ̆ tuai lĕ tơlơi ruă hŭi rơhyưt, tơdah ta tlâ̆o ia jrao pơgang tui anai lĕ klă biă yơh, tơdah hơdôm anom bruă rai tlâ̆o brơi tơl sang kâo amra tlâ̆o brơi mơtăm. Tơdah tlâ̆o brơi klă hloh, ƀing ta amra pơgang brơi hlô rông, tơdah ñu akĕ thơ ăt plai ƀiă mơn”.

Tơring glông Krông Pač hơmâo laih rơbêh 10.000 boh sang anŏ rông asâo hăng rơbêh 15.000 drơi. Samơ̆ amăng thun 2022 gơnong bruă wai lăng hlô rông kơnong pok pơhai tlâ̆o pơgang brơi 3.800 drơi đôč. Tui ơi Võ Văn Vàng - Khua anom wai lăng rông hlô hăng pơgang brơi hlô rông tơring glông Krông Pač, tơlơi tơnap tap hloh ră anai lĕ kơƀah tơlơi ngă hrŏm mơng mơnuih rông asâo:

“Tơlơi yôm hloh ră anai lĕ tơlơi pơmĭn mơng mơnuih rông hlô. Tơdah hlơi hlơi lêng kơ thâo bruă tlâ̆o pơgang tơlơi ruă djơ̆ tuai amra pơhlôm klă hloh. Samơ̆ ră anai, mơnuih ƀon sang ăt pơtah tai hăng bruă tlâ̆o ia jrao pơgang ruă djơ̆ tuai. Lu wŏt ƀing mơnuih rông asâo, eo ƀu gum hrŏm hăng ƀing hyu tlâ̆o pơgang, pơhmutu lĕ lơ̆m nao tlâ̆o ƀing gơñu kơnong črâo brơi asâo, ƀu gưt mă krưh brơi arăng tlâ̆o ia jrao”.

Tui jŭ yap mơng gơnong bruă ngă hmua hăng pơđĭ kyar ƀon lan, dong mơng thun 2018 truh thun 2022, Dak Lak hơmâo laih 25 čô mơnuih djuai yua djơ̆ tuai. Amăng anun, hơmâo mơnuih ƀă kman sui, asâo akĕ mơng 4 truh pơ 1 thun tơdơi kah mơng ƀuh. Abih bang ƀing mơnuih djai lêng ƀu tlâ̆o ia jrao pơgang tơdơi kơ asâo, eo, akĕ, kuač.

Mah rĭm thun lêng hơmâo hơmâo mơnuih djai yua djơ̆ tuai, samơ̆ bruă tlâ̆o vaccine pơgang djơ̆ tuai brơi hlô rông ƀơi Dak Lak kơnong rơbêh 30% amăng mrô abih bang 360 rơbâo drơi asâo, eo. Ră anai, Dak Lak glăk ngă tui bruă tlâ̆o vaccine pơgang djơ̆ tuai brơi asâo, eo amăng đơ đam tơring čar mơng lơ 25/3 truh 25/4. Tui anun, djop sang anŏ mơnuih djuai ania ƀiă, sang anŏ tui hơdră djru, sang anŏ ƀun rin amra tlâ̆o brơi soh sel asâo, eo. Ƀing pơkŏn amra tlâ̆o mă 22.100 prăk/ară.