Lơ 20/3, Khua sang phat kơđi dêh čar ơi Nguyễn Hòa Bình hăng Khua anom bruă ĕp kơđi dêh čar ơi Lê Minh Trí lăi glăi tơlơi tơña jơnum lok 21 mơ̆ng Jơnum min apăn bruă phun pơ ala mơnuih ƀôn sang dêh čar tal XV. Jơnum anai pơdah thâo amăng tivi, pơtui jua pơhiăp brơi pơƀuh ƀô̆ mơta hăng 62 grup khua mua pơ ala mơnuih ƀôn sang dêh čar ƀơi tơring čar, ƀôn prong. Nao jơnum hrom tơña mơ̆ng anih jơnum ƀơi Dak Lak, pô pơ ala Nguyễn Thị Thu Nguyệt, grup khua pơ ala mơnuih ƀôn sang dêh čar ƀơi tơring čar Dak Lak brơi thâo:

Ƀơi mông jơnum tơña, khua mua pơ ala mơnuih ƀôn sang dêh čar tơring čar Dak Lak hơmâo rơkâo brơi ngă rơđah hloh hơdôm tơlơi dŏ aka ƀu găl sang phat kơđi djop gưl phat kơđi hăng tơlơi soh sat; ngă tui ƀu djơ̆ mơta tơlơi, glông tơlơi phiăn pơkă; ngă tui dŏ kơƀah hnong pơkă pơđĭ trun tơlơi bơtơhmal, kơtưn bruă mă glăm ba hăng tơlơi soh sat, anun ba truh phat kơđi bơtơhmal tơdu hloh pơkă hăng tơlơi soh hơmâo ngă sat; hơdră pơsir tơlơi kơƀah anai ăt gleh glar mơ̆n amăng bruă ĕp hră pơar, kơnôl tơlơi soh. Lăi nao kơ tơlơi lăi glăi mơ̆ng dua čô khua gah sang phat kơđi dêh čar hăng khua anom bruă ĕp kơđi dêh čar, pô pơ ala Nguyễn Thị Thu Nguyệt lăi lĕ, dua čô khua anun lăi glăi tơpă, glăm ba sit nik.