Amăng mông jơnum, tơring čar Dak Lak lăi pơthâo hơdôm bruă đing nao pơhưč tuh pơ alin, đing nao bruă ngă yua yua boh thâo phrâo hăng pơkra gơnam klă hloh, tuh tai pơkra ming, apui lơtrik pơkra phrâo, logistics hăng anih anom jơlan glông. Jơnum min mơnuih ƀon sang tơring čar Dak Lak hơmâo jao tơlơi pơtrun tŭ yap tơlơi črâo trun tuh pơ alin brơi 25 akŏ bruă, hăng abih tih prăk tuh pơ alin rơbêh 40.290 klai prăk. Tơring čar ăt kĭ hră pioh hơdor ngă hrŏm hăng 78 anom bruă tuh pơ alin, hơmâo abih tih prăk čih mă yua blung a rơbêh 1 klăk klai prăk.

Đĭ pơhiăp git gai mông jơnum, Đại tướng Phan Văn Giang, Khua ding jum ling tơhan lăi pơtong, bruă lăi pơthâo dưm dăp man pơdong yôm phăn biă mă hăng bruă pơđĭ kyar tơring čar Dak Lak amăng rơwang phrâo. Kơnuk kơna čang rơmang Dak Lak amra tŭ mă klă hơdôm tơlơi gal hăng tơlơi dưi kiăng ba glăi tơlơi pơtrut pơđĭ kyar phrâo, hrưn đĭ ngă klă, kơtang pran bơkơtưn amăng bơwih ƀong huă.