Lơ 3/7, Jơnum min mơnuih ƀôn sang tơring čar Dak Lăk jơnum lăi pơthâo hơdôm tơlơi pơtrun mơ̆ng Khua Jơnum min mơnuih ƀôn sang tơring čar kơ bruă ruah khua. Hăng tơlơi pơtrun phrâo, anom bruă ƀơi Dak Lăk tơdơi kơ pơmut hrŏm hơmâo kjăp laih, pơhlôm ngă bruă bơbruai. Ƀơi mông jơnum, Jơnum min mơnuih ƀôn sang tơring čar Dak Lăk lăi pơthâo bruă tŭ mă, pơhrua tui hăng tŭ yap khua mua mơ̆ng lu anom bruă ƀơi tơring čar. Rơđah biă ñu: Ruah ơi Trần Văn Tân - Khua gơnong bruă prăk tơring čar Phú Yên (hơđăp) ngă Khua Gơnong bruă prăk tơring čar Dak Lăk.

Tŭ mă hăng pơhrua ơi Cao Đình Huy - Kơ-iăng khua Ping gah plơi prong, Khua Jơnum min mơnuih ƀôn sang plơi prong Tuy Hòa, tơring čar Phú Yên ngă Khua anom bruă Man pơdong tơring čar Dak Lăk. Ruah yă Lê Thị Thanh Xuân - Khua gơnong bruă pơtô hăng pơjuăt tơring čar Dak Lăk (hơđăp) ngă Khua gơnong bruă pơtô hăng pơjuăt tơring čar Dak Lăk. Ruah ơi Nay Phi La - Khua gơnong bruă ia jrao tơring čar Dak Lăk (hơđăp) ngă Khua gơnong bruă ia jrao tơring čar Dak Lăk.

Pơhiăp ƀơi mông jơnum, Khua Jơnum min mơnuih ƀôn sang tơring čar ơi Tạ Anh Tuấn bơni, lăng yôm hơdôm bruă hơmâo ngă, tơlơi gum djru hăng tơlơi gơgrong bruă mơ̆ng ƀing khua hơmâo ruah đĭ, laih dong kiăng ƀing khua pơtrut tui tơlơi rơgơi apăn bruă mơ̆ng ƀing gơñu hăng gum pơgôp akŏ pơdong gong gai kơnuk kơna mă bruă tŭ yua, djơ̆ tui rơnuk đĭ kyar phrâo mơ̆ng tơring čar./.