Mông Jơnum kơđŏm kru đĭ kyar phrâo mơ̆ng tơring čar Dak Lăk tơdơi kơ pơmut hrŏm, laih dong pok rai anih đĭ kyar anăp nao sui thun yun blan, pơjing atur či pơhưč anom bruă tuh pơ alin. Amăng bruă pơkă hơnong, man pơdong phrâo, Dak Lăk kiăng jing anih đĭ kyar akŏ phun mơ̆ng kual ter hang ia rơsĭ Dơnung Tong Krah hăng Dap Kơdư, đĭ kyar mơtah mơda, pơplih phrâo hăng hơđong kjăp.

Boh thâo ia rơgơi, pơčeh phrâo tơlơi rơgơi, mă yua boh thâo mrô, hăng bơwih ƀong mơ̆ng ia rơsĭ hơmâo tơring čar Dak Lăk pơsit jing hơdôm akŏ bruă đĭ kyar phrâo. Anih đĭ kyar phrâo hơmâo pơphun tui hơbô̆ bruă 3 kual đĭ kyar, 3 glông bơwih ƀong hăng 2 anih yom phun pơtrut đĭ kyar. Amăng anun kual Buôn Ma Thuột gơgrong phun amăng bruă đĭ kyar kual Dap Kơdư, bơ gah Ngŏ hơmâo pơjing jing anih đĭ kyar phrâo gah boh thâo ia rơgơi, logistics, tơdrun kom păn hăng bơwih ƀong mơ̆ng ia rơsĭ, đĭ kyar kơnang kơ bơwih ƀong mơtah, bơwih ƀong pơdar nao rai, pơčeh phrâo, hăng ba yua ia rơgơi mrô. Gir hơmâo rơnoh đĭ kyar GRDP rơwang thun 2026-2030 mơ̆ng 11% /thun truh pơ ngŏ, truh thun 2030 prăk pơhrui rim čô mơnuih hơmâo rơbêh 153 klăk prăk.

Ƀơi mông jơnum, ơi Đỗ Hữu Huy, Khua jơnum min mơnuih ƀôn sang tơring čar Dak Lăk pơsit: “Tơlơi kiăng đĭ kyar tañ, hơđong kjăp kơnong kơ dưi ngă hơmâo abih bang anom bruă kơđi čar gum hrŏm hăng sang bruă mơdrô, anom bruă tuh pơ alin. Tơlơi mơ̆ ƀing tuh pơ alin čang rơmang ƀu kơnong jơlan đĭ kyar pơ anăp đôč ôh, ăt kiăng hơmâo sa gong gai ngă bruă rơđah, tơpă sit, khut khăt laih anun gum hrŏm. Yua hnun, hrŏm hăng bruă pơkă hơnong, dăp rơmet djŏp mơta, tuh pơ alin pơkra anih anom, jơlan nao rai laih dong prăp lui lŏn tơnah či man pơdong, Dak Lăk pơsit pơplih bruă ngă hră pơ-ar, pơplih klă anih tuh pơ alin sĭ mơdrô jing bruă akŏ phun, pơplih prong hloh; lăng mơnuih ƀôn sang hăng sang bruă mơdrô yơh pô či bơwih brơi”.

Ƀơi mông jơnum, tơring čar Dak Lăk ăt lăi pơthâo anăn hơdôm bruă kiăng iâu pơthưr tuh pơ alin hlâo, pơƀut gah bruă ngă hmua mă yua boh thâo ia rơgơi yom laih anun pơkra gơnam klă, jơman hloh, pơkra pơjing măi mok, apui lơtrik phrâo, logistics hăng anih anom, jơlan glông. Jơnum min mơnuih ƀôn sang tơring čar Dak Lăk brơi hră tŭ ư tuh pơ alin kơ 25 kơčăo bruă, hăng mrô prăk 40.290 klai. Tơring čar ăt kĭ hră ngă hrŏm hăng 78 sang bruă tuh pơ alin, prăk či ngă bruă blung a rơbêh 1 klăk klai prăk./.