Sang anŏ amai H’Unh Hmok ƀơi ƀuôn Tul A, să Ea Wer, tơring čar Dak Lăk jing sang anŏ rin. Tơlơi hơdip dŏ tơnap biă mă, anun yơh bruă prăp brơi ană bă hrăm hră lơ̆m mut thun hrăm phrâo jing bruă tơnap biă mă. Lu thun rơgao, ƀing nai sang hră gưl sa Nguyễn Du juăt lăng ba, djru brơi sang anŏ gơnam či yua, kiăng ană amai H’Unh ăt dưi nao hrăm hră mơn: “Hơmâo ƀing nai lăng ba, pơtrut pơsur, mah tơnap tap hai ăt gir prăp brơi ană bă hrăm hră yơh. Ƀu hơmâo gai čih, ƀu hơmâo hơdrôm hră ƀudah ƀu hơmâo hră čih lĕ kâo hiăp tom ƀing nai. Dưi djru anŏ hơget lĕ ƀing nai djru brơi anŏ anun”.

Sang hră gưl sa Nguyễn Du, să Ea Wer, tơring čar Dak Lăk hơmâo rơbêh kơ 85% čô čơđai djuai ania ƀiă, amăng anun lu čơđai sang anŏ kơƀah, tơnap biă. Kiăng dưi hơmâo djŏp mrô čơđai amăng anih hrăm, sang hră pơsit khŏm hơduah ĕp, thâo rơđah tơlơi hơdip mơ̆ng rim boh sang, laih anun hyu iâu čơđai nao hrăm. Nai pơtô H’Thong Thíp lăi pơthâo, mơ̆ng akŏ blan 8, hrŏm hăng lăi pơhmư̆ amăng Zalo, Facebook, ƀing nai nao tơl sang, biă ñu hơdôm boh sang aka ƀu hmư̆ tơlơi pơhing, iâu pơthưr amĭ ama sang anŏ brơi ană bă nao pơ sang hră: “Mah lăi pơthâo laih amăng zalo, facebook, samơ̆ pơ anai lu neh met djuai ania ƀiă, jing gơñu ƀu pơđing nao ôh. Hơdôm boh sang anŏ aka ƀu hmư̆ tơlơi pơhing gơmơi pôr amăng plang ngui mơnuih mơnam, ƀing nai pơtô djuai ƀiă pơ anai nao tơl sang lăi pơhmư̆ brơi kiăng amĭ ama ƀing čơđai ngă hră, mơit hră mut hrăm, laih dong lăi pơthâo hrơi mông, anih čơđai nao hrăm”.

Ba čơđai nao pơ sang hră tơnap laih, kiăng ƀing čơđai hơ’et pran nao hrăm, kiăng djru ba hră čih, sum ao, kơdung hră. Yua hnun, ƀing nai pơtô ƀơi Dak Lăk juăt iâu pơthưr hơdôm anom bruă, mơnuih mơnam gum djru ba čơđai tơnap tap. Yua hnun mơn, lu sang hră pơ plơi pla ataih yaih, plơi pla tơnap ăt hơmâo 100% mrô čơđai nao sang hră tui hơnong pơkă, huăi hơmâo pô lui sang hră ôh.

Nai neh Đỗ Thị Xuân, Khua sang hră gưl sa Nguyễn Du (să Ea Wer), lăi, hlâo či mut thun hrăm, lu gơnam hơmâo brơi kơ ƀing čơđai sang anŏ tơnap, kiăng ƀing čơđai hơmâo pran nao hrăm hră: “Hơmâo laih dua grup, hơjăn pô glăi djru sang hră. Sa lĕ djru hơdrôm hră, hră čih, gai čih hăng ƀing čơđai sang anŏ rin hăng sang anŏ tơnap. Laih anun mut thun hrăm phrâo lĕ sang hră iâu pơthưr mơn khul grup, mơnuih juăt djru mơnuih tơnap tap djru ba sang hră 170 blah sum ao, kơdung hră kơ ƀing čơđai sang hră tơnap tap, ƀun rin”.

Thun hrăm 2026-2027, Sang hră kơnuk kơna čem rông gưl sa - gưl dua Buôn Đôn, tơring čar Dak Lăk mut thun hrăm phrâo tui jơlan gah sang hră kơnuk kơna čem rông pơƀut dua gưl hrăm, hơmâo rơbêh 40 anih hrăm hăng rơbêh 1.000 čô čơđai. Mah gơnam yua amăng sang hră hơmâo pơhrup hiam laih, hơmâo mơn čơđai anih 1 truh pơ anih 3 ƀơi ƀuôn Drang Phôk tơnap tap lơ̆m nao hrăm pơ sang hră phrâo, yua dah sang hră ataih mơ̆ng sang mơ̆ng 15 truh kơ 20km. Ơi Thái Văn Lộc, Khua sang hră, lăi nao tơlơi anai, laih anun mơ̆ng tơlơi rơkâo đĭ mơ̆ng amĭ ama ƀing čơđai, sang hră glăk prăp rơmet rơdêh pơgiăng čơđai nao rai pơ sang hră: “Sang hră lăi pơthâo laih hăng Jơnum min mơnuih ƀôn sang să kiăng pơthâo brơi tơring čar, djru prăk kiăng hơmâo rơdêh pơgiăng ƀing čơđai: mơguah mơ̆ng ƀuôn Drang Phôk, tlam čơkă mơ̆ng sang hră, kiăng ƀing čơđai hrăm hră, pơtŏp rơguăt amăng anih hrăm rơnuk rơnua, hiam, hơmâo djŏp anŏ gêh găl hăng hơmâo djŏp anih wai lăng ba ƀing čơđai kiăng klă hloh”.

Hơdôm tơlơi hơmâo ƀơi hơdôm boh sang hră tơnap tap brơi ƀuh, anŏ pơgăn čơđai nao pơ sang hră ƀu kơnong kơƀah prăk đôč ôh, ăt tơnap yua jơlan ataih đơi, bruă hmư̆ tơlơi pơhing hăng tơlơi dŏ dong ƀong huă mơ̆ng rim sang anŏ. Yua hnun, prăp kơ thun hrăm phrâo, khŏm ĕp ƀuh anŏ tơnap đah mơ̆ng thâo pơsir brơi.

Ơi Lương Nguyễn Minh Triết, Ding kơna apăn bruă Ping gah, Khua ping gah tơring čar Dak Lăk git gai hơdôm boh tơring pơhlom brơi anih hrăm, nai pơtô, hơdrôm hră, hăng djŏp mơta tơlơi gêh găl hrăm hră, biă ñu pơ kual ataih yaih, kual mơnuih ƀôn sang djuai ƀiă, pơ guai dêh čar: “Pơhlom brơi djŏp gơnam yua, anih hrăm, hơdrôm hră, gơnam pơtô hrăm hăng djŏp tơlơi či kiăng amăng thun hrăm phrâo. Lăng glăi abih bang, pơtŏng glăi anŏ klă bruă pơtô hăng hrăm; hơmâo hơdră pơsir tong ten pơđĭ tui anŏ klă bruă pơtô hrăm amăng kual mơnuih ƀôn sang djuai ƀiă, kual ataih yaih, pơ guai dêh čar; ngă añip tui anŏ phara mơ̆ng rim kual; plai ƀiă hơmâo čơđai lui sang hră, anăp nao huăi hơmâo dong tah čơđai lui sang hră yua sang anŏ tơnap”.

Mơ̆ng sa pok hră, sa blah sum ao, truh kơ rơdêh pơgiăng čơđai, hơdôm gơnam yua anai glăk djru ba ƀing čơđai pơ plơi pla tơnap tap ƀơi Dak Lăk dưi nao sang hră. Glah tlôn bruă prăp rơmet kơ sa thun hrăm phrâo ƀu kơnong hơdôm boh sang hră hơmâo pơkra hiam đôč ôh, anun jing tơlơi gir ƀu brơi čơđai pơpă lui sang hră yua sang anŏ tơnap ƀudah yua sang hră ataih đơi./.