Mơguah lơ 1 Tết Prang thun 2025, tal por mơ̆ng anom rơdêh por Vietnam Airlines hmâo mrô VN1603 mơ̆ng Hà Nội – Buôn Ma Thuột plĕ trun ƀơi tơdrŏn rơdêh por Buôn Ma Thuột, tơring čar Dak Lak pơgiăng ba 120 čô tuai hăng mơnuih mă bruă amăng grŭp djă rơdêh por. Anai lĕ ƀing tuai tal sa klăk rơma rơtuh rơbâo hăng jing tuai blung a “pơphun pok jơlan” tơring čar Dak Lak amăng thun 2025 tui jơlan por.

Amăng kual tuai jưh amăng tơdrŏn rơdêh por Buôn Ma Thuột, mông ngă lơphet čơkă tuai tal “sa klăk rơma rơtuh rơbâo” hăng grŭp tuai čuă ngui blung a rai pơ̆ Dak Lak ƀrô djơ̆ tal tết Prang thun 2025 pơphun yôm phăn hăng jơlan hơdră atông čing hơgor hăng tơlơi adôh suang phara ha jăn. Khua pơ ala kơ tuai čuă ngui tơring čar Dak Lak hăng wai lăng tơdrŏn dŭ pơgiăng gơnam rơdêh por Buôn Ma Thuột jao bơnga hăng gơnam čơkă tuai rai čuă ngui blung a pơ̆ tơring čar amăng hrơi akô̆ thun phrâo.

Bưng biă tuai tal sa klăk rơma rơtuh rơbâo rai pơ̆ Dak Lak, amai Lưu Minh Lan, dô̆ ƀơi quận Long Biên, Hà Nội pơdah pran jua ol kơdol biă hăng hơk mơ-ak tơlơi čơkă jum tâ̆o klă, abih pran jua mơ̆ng tơring čar Dak Lak amăng hrơi blung a thun phrâo.

“Akô̆ bơyan bơnga thun phrâo lĕ thun anai abih bang sang anô̆ nao hrŏm, ƀing čơđai ăt hyu pơdơi pơdă mơn, anun sang anô̆ kâo hmâo sa rơwang hrơi tơjuh dô̆ glăi pơ̆ anai. Kâo ăt nao mơn pơ̆ sa dua anih anom, tal anai kâo nao pơ̆ drai ia Gia Long laih anun nao pơ̆ dơnao ia Lak”.

Phiăn ngă yang čơkă tuai tal “sa klăk rơma rơtuh rơbâo” hăng grŭp tuai čuă ngui blung a rai pơ̆ Dak Lak ƀrô djơ̆ tal tết Prang thun 2025 jing bruă mă kiăng lăi nao amăng hrơi blung a thun phrâo kiăng pơđĭ dlông gru rup, anăn păn anih anom tuai čuă ngui Dak Lak, ngă pơhưč tơlơi đing nao mơ̆ng tuai, biă ñu tuai amăng lŏn ia ta hăng dêh čar tač rơngiao. Hrŏm hăng anun, anai ăt lĕ tal pioh lăi pơthâo hơdôm anih anom tuai čuă lăng phara ha jăn hăng anô̆ hmâo pơđĭ kyar tuai čuă ngui mơ̆ng tơring čar, djru klă pơdŏng hăng pơđĭ kyar anăn păn anih anom tuai čuă ngui Dak Lak. Yă Nguyễn Thụy Phương Hiếu, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui Dak Lak brơi thâo:

“Gơnong bruă ăt čang rơmang mơn ƀing tuai amăng tal por rai pơ̆ Dak Lak amra lăng ƀuh mơnuih Dak Lak tâ̆o klă, lăng juăt, thâo kiăng tuai. Hloh kơ hlơi, ƀing tuai anai amra lăi pơhing, lăi pơhưč kơ gru rup, ană mơnuih Dak Lak hăng mơnuih amăng sang anô̆, gơyut gơyâo hăng tơdơi kơ anun ăt yua mơ̆ng ƀing gơñu mơn amra jing mơnuih pơtô brơi lăi pơthâo Dak Lak hăng hơdôm tơlơi djă pioh, djru pơđĭ kyar tuai čuă ngui rai pơ̆ Dak Lak”.

Thun 2024, abih bang prăk pơhrui glăi mơ̆ng tuai čuă ngui ƀơi Dak Lak hmâo 1.255 klai prăk, đĭ rơbêh kơ 21% bơhmu hăng thun 2023. Dak Lak čơkă hmâo 1,5 klăk  wot čô tuai. Mrô tuai dêh čar tač rơngiao rai pơ̆ Dak Lak ăt đĭ mơn rơbêh kơ 34% bơhmu hăng thun hlâo. Anai lĕ gru nam klă hăng Dak Lak amăng gir run pơlar gơnam anih anom phrâo, đing nao mă yua hơdôm gru grua phara ha jăn amăng bôh thâo čư̆ siăng, mlar kơ mơta lăng.

Anô̆ ƀuh rơđah amăng bruă tuai čuă ngui mơ̆ng tơring čar phrâo rơgao lĕ nao hrŏm hăng hơdôm bruă mă čơkă mơ-ak hơdor glăi 120 thun hrơi pơjing tơring čar Dak Lak. Tơring čar hmâo pơphun dong lu anih anom tuai čuă ngui plơi pla ƀơi hơdôm anih anom, ngă tui anô̆ gal mơ̆ng rim djuai ania pioh pơjing gru pơđom pioh phara ha jăn. Amăng anun, hơdră tô nao rai gru grua “čing hơgor Dap Kơdư amăng bruă tuai čuă ngui Buôn Ma Thuột - Dak Lak” amra pok prong pơ̆ anăp anai. Ơi Lại Đức Đại, Kơ-iăng Khua Gơnong bruă bôh thâo đưm, bơkơjăp drơi jăn hăng tuai čuă ngui Dak Lak brơi thâo, hơdră amra djru mơnuih ƀôn sang thâo rơđah hloh nua yôm gru grua đưm mơ̆ pô thâo kơjăp, ư-ang dong hăng ƀơi anăp pơtô glăi bôh thâo čing hơgor Dap Kơdư; Ngă gal brơi pioh gru grua bôh thâo čing hơgor jing ngăn rơnoh kơ tuai čuă lăng, tô nao rai plơi pla hăng pơjing glông jơlan tuai čuă lăng gru grua đưm.

“Amra hmâo tơlơi gum hrŏm kơjăp hloh, ƀu kơnong kơ pok pơhai 1-2 hơdră ôh mơ̆ amra pok pơhai lu hơdră hrŏm sa wot, hơdôm rơnuk amra tô nao rai hăng gum hrŏm mơ̆ng ƀing thâo bruă, mơnuih thâo tơlơi đưm. Bruă rơkâo mơ̆ng hơdôm anih anom gơgrong hlâo ăt kah hăng bruă ba tơbiă kơčăo bruă mơ̆ng phun mơ̆ng Gơnong bruă sit ñu amra hmâo tơlơi tô̆ tui hăng lu hnưr hmâo anô̆ kơjăp hăng ba glăi bôh tơhnal prong”./.